முகநூல் கவிதைகள் சில

வனமாக விரும்பிய விதைக்கு 
பழைய போத்தல் நிலமானது 
யார் வகுத்த விதி

********************************************
அந்த மேகம் நகர்ந்து கொண்டேயிருக்கிறது
காக்கை,கழுகு,என் அபிமான நேசன்
என
யார்யாரையோ கண்டுகொண்டிருக்கிறேன் 
மேகத்தையும்
உணர்கிறேனா என உணராமலே
அந்த மேகம் நகர்ந்து கொண்டேயிருக்கிறது
அதை மேகம் என்று சொல்வதும் கூட
அறியாது
அந்த மேகம் ....
***************************************************
முகமூடிக்குப் பின்னால் இருப்பதும் 
முகம் இல்லையா
*******************************************
அதிகாலை நான்கு மணிக்குத்தான் 
குயில் கூவும் 
இது என்ன கடிகாரம் 
நான்கு மணியே இல்லாமல் 
*************************************************
தூரத்து ஒற்றை இருக்கை
தந்த நம்பிக்கை 
இரைத்தமூச்சையும் பொருட்படுத்தவில்லை 
நொடித்த கால்கள் 
தெரிந்துவிடாமல் 
தூரத்திலேயே இருக்கட்டும்
************************************************
கனவு என்று சொல்
கற்பிதம் என்று சொல்
அறியாமை என்று சொல்
பேராசை என்று சொல்
பிச்சி என்று சொல் 
பிழை என்று சொல்
பொய் என்று...
************************************************
வண்ணங்களைக் குழைத்தபோது 
தோன்றியதெல்லாம் ஓவியம்தான் 
கை அழுக்காகும் 
என 
முடிந்தபோதுதான் தெரிகிறது
*****************************************
நன்றாகத்தான் பேசுகிறீர்கள் 
நம்பிக்கையைப் பற்றி 
கைப்பையை 
இறுகப்பிடித்தபடி
******************************************
தொடுத்ததும் விடுத்ததும் 
சூடியதும் 
சூட்டியதும் 
உதிர்ந்ததும் பறித்ததும் 
அதே பூதான்
**********************************
நாய் நினைத்தது
மறந்தது
நாயையும் மறக்காமல்
நாய் நினைத்ததையும் மறக்காமல் 
ஒரு பிழைப்பு

படம்-ராஜி சுவாமிநாதன்

கருத்துகள்

இந்த வலைப்பதிவில் உள்ள பிரபலமான இடுகைகள்

கமல்ஹாசன் சொல்லாத தீபாவளி

அளவிலா விளையாட்டுடையான்

அம்மாவும் கைபேசியும்