அறுக்கப்படும் எண்கள்

எண்களோடு இவ்வளவு பிணைக்கப்படும் 
உங்கள் வாழ்க்கை என்று 
நீங்கள் நினைத்தறியா காலம் ஒன்றிருந்தது
மனப்பாடமாக சொல்ல முடியா அளவுக்கு 
உங்கள் நட்பும் உறவும் 
எண்களின் அடுக்கில் செருகப்படுவார்கள் 
என்றே நினைக்கவில்லை
அப்புறம் இதுவும் தொடங்கியது
எங்கெங்கும் உங்கள் முகம்
உங்கள் அங்க அடையாளம்
உங்கள் பெயர் எல்லாம் 
எண்ணால் மட்டுமே
உயிர்ப்பிக்கப்படும் உறைநிலைக்குப் போனீர்கள்
ஒரு எண் தவறி
உறவுகள் உருவாகின
முறிந்தன
கோபம் கொண்டன
கேவலப்பட்டன
எப்போதும்போல எல்லாம் சுபம் 
என்றே நீங்களும் 
எண்களை
இரத்தமும் நரம்புமாகப் பிணைத்துக் கொண்டீர்கள்
அது அறுத்தெடுக்கப்படும் 

சதையென்றபோது
உங்கள் அவஸ்தையைத்தான் காணச்சகியவில்லை