கனவு செருகிய எறவாணம்

எதை நோக்கிதான் இத்தனை நடப்பது
சிறு அரளிக்கிளையை ஊன்றிக்கொண்டு
நடைக்கு கூட கசப்பேறிய பின்னும்

**********************************************************
கனவுகளைச்செருகிவைத்த எறவாணம் 
யானைவிரட்டலில் பிய்ந்துபோனது
குப்பை வாருவதில் நிற்கிறது கைவண்ணம்

**************************************************************

திரளும் கண்ணீரைத்
தொட்டு தொட்டு ஒற்றிப்பிழிந்து
நீர்வார்த்த முல்லையின் நிறம் 

அப்படித்தான் இருக்கும்

***************************************************************
பழமுதிரிலோ,உழவர் சந்தையிலோ 
பேரம் பேசியோ பேசாமலோ 
நீங்கள் வாங்கும் சுரை எல்லாம் 
முற்றித்தான் இருக்கிறது
இற்றுப்போன பால்யத்தின் 
கூரையில் எக்கி எக்கி
இழுத்துப்பிய்த்த சுரைப்பிஞ்சின் 
மென்மையை நினைவில் கிடத்தியிருக்கும்வரை

அந்தப்புறங்கையில் பாருங்கள்
அதே பனித்துளி
****************************************************************************