விடைபெறுவதும் புதுப்பிறப்பும்

அடுக்க முடிவதெல்லாம்
 அடுக்கி வை 
அதற்கப்பாலும் படியும் தூசி

***************************************************
பூட்டிய நிலைக்கதவு மேலெல்லாம் 
நூலாம்படை 
அக்கரையிலிருந்தே பாவனையாய் 
நீ துடைப்பது யாருக்குப் புரியும்

*****************************************************
ஒரு ஆண்டு நாட்காட்டியின் 
தாள்களைக் கொண்டு மட்டும் 
அமைந்திருக்கவில்லை
நம் வாழ்நாட்களைக் கோர்த்த மாலை அது
இருப்பில் இருப்பதை அறிவிக்காது 
இளநகையோடு நகர்கிறது
குள்ளமாகா உள்ளங்கொண்டு 
உயரச்சொல்லியபடி கடைசித்தாளை உதிர்க்கிறது
மறந்திருக்கும் எண்ணங்களை
பிரிந்திருக்கும் உறவுகளை
உடைமைகளை
உரிமைகளை
கடமைகளை
கனவுகளை நினைவூட்டியபடி நகர்கிறது
பாதையோரக் குழந்தையாக நின்றுகொண்டிருக்கும் 
நீங்கள் கையசைத்தால் 
குதூகலமாக எட்டிப்பார்த்து ஆட்டும் ஒருவராக
சலனமின்றி பார்த்திருக்கும் ஒருவராக
கண்மூடித்தூங்கியபடி 
உங்கள் இருப்பை அறியாத இன்னொருவராக
எப்படி வேண்டுமாயினும் அது கடக்கட்டும்
வாருங்கள் 
நாம் குன்றா மகிழ்வோடு 

கையசைத்து ஆடுவோம்