திரிகை மாவு

 எதையெல்லாம் என்னுடையதென்று சொல்வது சுற்றிலும் சுற்றிலும் ஊக்கு சரம் முதல் மணச்சீராய் வந்த பித்தளை அண்டா வரை

என் முகம் பாராது

அதனதன் இருப்பில்

அந்த அண்டா கூடுதலாய்

ஒரு நொடிப்பு நொடித்து

நின்று கொண்டது

என் கேள்வி உணர்ந்து விட்டதோ

*********************************************

எல்லாம் வேறென்ன

இந்த இருளுக்குள்ளேயும்

நான் இருக்கிறேன்

இந்த ஒளிக்குள்ளேயும்

நான் மறைகிறேன்

எப்படியாவது கண்டுபிடி

அல்லது கண்டுகொள்

****************************************

கைப்பிடி கைப்பிடியாகப் பெய்ய

திரிகைக்குள்ளிருந்து

மௌனமாக வீழ்ந்து கொண்டிருக்கிறது

உளுந்து

உடைபட்ட துக்கம் சொல்லாது

என்ன

கொஞ்சம் மாவு பறக்கும்

***********************************************

அம்மாவுக்கு எல்லாம் தெரியும்

 நச்சு நச்சென அம்மியில் தேங்காய்ப் பத்தைகளை நசுக்கும் முன்னரே அம்மாவுக்குத் தெரிந்திருந்தது

அதிலிரண்டு பத்தை

கடைவழியிலேயே

அதாங்க இது

வாழைப்பழமாகத்

தொலைந்திருக்கும் என்று

அளவை ஈடுகட்ட

அதற்குமுன்பே

உளுந்து வறுத்திருந்தாள்

கூடக்குறைய

 

பிரகாரத்தில் சில்லுச்சில்லாக
உடையாததற்காக
திட்டு வாங்கும் தேங்காய்
சற்றுமுன் கருவறையில்
ஓரம்தெறிக்கக் கூடாதேயென்று  
பதட்டத்துடன் பார்த்த
ஆள்தானா நீ என்கிறது
தெறித்து விழுகிறது  

சிரட்டைத்தூள் ஒன்று

******************************************************

கூடக்குறைய உளுந்து போட்டு

கூடக்குறைய அரைத்தெடுத்து

கூடக்குறைய புளிக்கவைத்து

கூடக்குறைய தொட்டுக்க வைத்து

அவிகிற இட்டிலி வாழ்க்கையில்

கல்லாய்க் கனக்காவிடில்

புளித்து விரட்டும்

புளித்து விரட்டாவிடில்

வேர்த்து நனையவோ

பாதி ஒட்டவோவாவது

வாய்த்துவிடும்

கூடக்குறைய