மே 17

ஈரமணல்
நின்றுகொண்டேயிருக்கிறேன்
குறுகுறுவென ஊறும் பெருமணலும் நுரையும்
சட்டென எக்கணமும்
என் பாதந்தாண்டி உடைநனைத்து
தரையரித்து இழுக்கலாம்
அலை ஏறி ஏறிப்போகிறது
இடமும் வலமுமாக
சற்றே உட்கார்ந்துகொள்ளச்
சொல்கிறது கால்கள்
எப்படியும் நனைக்காமலா போகும்
அடுத்து போகவேண்டியது
மலைமுகடு
ஒற்றைப்பாறை
நாள் நினைவூட்டும்
இழப்புகளுக்காக
கண்ணீரைப்பெருக்க
தோதான இடங்கள்
வேறு எதுவுமிருந்தாலும் சொல்லுங்கள்

ஈர மணல்

சிப்பியும் சங்கும் அள்ளி வராதவர் 
காலோடும்
ஒட்டிவந்துவிடுகிறது

ஈரமணல்


*******************************************************
தொலைவதற்கான ஆயத்தம் தேடலாக மாற
தேடலுக்கான ஆயத்தம் 
தொலைதலாகவில்லை
இருக்கிறேன்
இருக்கலாம்

***********************************************************
அழாதே எனச்சொல்லவில்லை
காலையில் அழாதே என்றாய்
பக்கத்து கண்ணாடியில் தற்செயலாக நோக்கிய
அழுவதற்கான காரணங்கள் 
திகைத்து நின்றன

****************************************************************

கிள்ளக்கிள்ள துளிர்க்கும் 
பசலைக்கொடிக்குப் புரிகிற மாதிரி 
ஒருமுறையாவது நன்றிசொல்ல வேண்டும் 
முடிந்து போகுமுன்

*********************************************************************
நேற்று மாலை வெளிச்சத்தைவிட 
இந்தக்காலை வெளிச்சம்
பூரணம் காட்டுகிறது
இடையில் வந்த இருள் 
தள்ளிநின்று சிரிப்பதை 
நான் கேட்க விரும்பவில்லை
பார்க்கவுமில்லை
அட..
அதைத் தெரியவே தெரியாது என்றே வையுங்கள்

*****************************************************************************