சிம்மக்குரல் பித்தன்களும் அங்காளி சன்னதியும்

உக்கிரம் என்பது
அவளைப்பற்றிய சித்திரம்

மண்டையோட்டில் 

இரவலர் வாழ்வை ஏந்தி ஆடும் 

பித்தனும்
நில்லாதே செல்லாதே 
என்று கட்டளையிடுகையில் 

சிம்மக்குரல் பெற்றுவிடுகிறான்

கொங்கையொருபுறம்
மங்கையொருபுறமுமாக
உதிர உதிர
எதிர்த்தாண்டவம் ஆடிய
காலங்கள் தாண்டி
டாஸ்மாக்கிலிருந்து திரும்பும் 

பின்னிரவுப் பித்தன்களின்
தாண்டவம் 

அடுப்பைக்கூட உக்கிரமாக எரிய 

அனுமதிக்கவில்லை

அவளுக்கு ஆறுதல்
அங்காளி சன்னதிகள்

கொஞ்சம் காக்கரட்டான் மல்லியும் 

அள்ளிப்பூசிய நிறமுமாக
வேறுமாதிரி 

ஒருநாளாவது இருக்கவைக்கும் 

அங்காளியைப பார்த்துதான் 

இப்படி ஒரு புன்னகை
இன்று என் மூக்குத்திக்கும் உன் நிறம்தான் என்று

விதானம் இல்லாத தூண்கள்

அன்றொரு நிரம்பிய நிலவுநாள்
பூதகணங்களின் மனமெங்கும் 

கலாமோகம் தளும்பிக் கொண்டிருந்த பொழுது

ஆளுக்கு ஒன்றோ ஐந்து பத்தோ
அரக்கப்பரக்க என்றோ
அணு அணுவாக ரசித்து என்றோ
உருவான வித்தையை விதந்தோதவும் யாருமிலாது உருவாகிக்கொண்டிருந்தன தூண்கள்
தத்தமது பெயர் பொறிக்காது
பொதுவில் உருவாயின

சற்றே தாமதமாக கதிரெழும்பியிருக்கலாம்

தன் கணங்களின் கூட நின்று
அவனாவது ஒற்றை விதானம்
போர்த்தியிருக்கலாம்
இப்படித்தான் செய்துவிடுகிறான்
பித்தன்

ஆடும் பாடு

துள்ளும் சில நேரம்
துவளும் சில நேரம்
மருளும்,மயங்கும் ,உருளும் ,உரசும்
மேகம் போலவே திரளவும் திரியவும்
பிரியவும் உடையவும் உருகவும்
ஊறவும்
பல்கிப் பெருகவும்
புள்ளியாய்ச் சுருங்கவும் செய்யும்
இதன் பெயர்தான்
ஆன்மாவா
சனியன் என்ன பாடு

இசை நின்ற பொழுதுகளில்
காலைப் பிராண்டும்
உன்னை எப்படிக் கொல்வேன்
நான் ஓடிக் கொண்டிருக்கும்
இசை நாற்காலிப் போட்டியின்
ஒலிவிசைக் கட்டுப்பாடோ
ஒரு

பித்தனின் கையில்