பாதை மாறிய பயணங்கள்

 

 

எதைக் கொண்டு வந்தோமென்றும்
தெரியாமல்
எதைக் கொண்டு போகிறோமென்றும் 
தெரியாமல்
போக வேண்டும் என்றுமட்டும் 
தோன்ற வைத்து விடுகிறீர்கள்.
அவர்களும் கிளம்பி விடுகிறார்கள்
நீங்கள் குப்பையில்
வீசியவற்றை மாட்டிக் கொண்டாவது

நம்பிக்கைதான்
நெடுஞ்சாலைகளின் மீது

அவர்களில் எவரோ வார்த்த
தார்தானே 

**************************************************************

மாறிச்செல்லாத பாதை என்று அறியப்பட்ட
தண்டவாளங்களும்
நூற்றுக்கணக்கான கருவிகளும் தாண்டி
எங்கள் பயணங்கள்
எங்கெங்கோ செல்கின்றன

இரக்கமுள்ள மனிதர்கள்
பொட்டலங்களோடு வரும்வரை
திசையறியாது நடந்துகொண்டே இருக்கின்றன
கால்கள்

கால்களுக்குப் பசிப்பதில்லை

ஆனால் அம்மா
இங்கிருந்து எங்கு செல்ல வேண்டுமெனச்
சொல்லாமல்
ஏன் உறங்குகிறாய்....

எங்களிடம் நீர் இருந்தது

எங்கள் கிணறுகளில் நீர் இருந்தது

பத்து வீட்டுக்காரர்கள் வந்து இறைத்தபோதும்

பகிர்வதில் கவலையின்றி இருந்தோம்

எங்கள் குளங்களில் நீர் தளும்பியது

உயர்த்திக்கட்டிய உள்பாவாடையுடன் 

கதையளந்தபடி துணி சவக்காரத்தையே 

இரண்டு இழுப்பு தேய்த்து 

உடைந்த கரையின் சில்லில் 

மஞ்சள் உரசிக்குளியல் முடிப்பதில் 

கூச்சமின்றி நடந்தோம்

பிழிந்த துணி தோளிலும் 

தெருமுனைக்குழாயின் குடம் இடுப்பிலுமாக

நடந்தபோதும்

நனைந்த உடலின் வளைவுகள் 

விரசமாகத் தெரியாத சகமாந்தர்

உடன் நடமாடினோம்

எங்கள் ஆறுகளில் நீரோடியது

கரையோர மரங்களின் பூக்களும்

வறண்டகாலத்தில் விழுந்திருந்த இலைதழையுமாக

புனல் வந்தபோது ஒரு துறையில்

பெருக்கு கொண்டாடினோம்

பிள்ளைகள் மதகிலிருந்து சொருகு நீச்சல்பழக

அப்பன்கள் ஆடுமாடுகளை

வைக்கோல் பிரியோடு தேய்த்துக்கொண்டிருந்தார்கள்

கிணறுகளில் நீரிறைக்க வலுவில்லாது 

பொருத்திய

மோட்டார்கள் பரிதாபமாக முனகும்போது 

விழுந்த நீரிலும் வண்டல்

பிடித்த மனதிலும் அதுவே

மீன்வளர்க்க ஏற்றதாக

குளமும் குட்டையும் மாறியபோது

வீடெங்கும் குளியலறை கட்டுமளவு

முன்னேறிவிட்டோம்

யார் வீட்டு குளியலறையை யாரோ 

எட்டிப்பார்க்கும் நாகரிகத்திலும்

எங்கள் 

ஆறுகளா....

மணல் கிடங்குகளாகி வெகு காலம்

தண்ணீரை அனுப்புவாயா இல்லையா எனத்

தண்டவாளங்களில் விழுந்து கிடக்கிறோம்

விழுந்துதான் கிடக்கிறோம்

படம் .நன்றி sunderarajan 

ஆயாசமாக இருக்கிறது

எத்தனை பேரிடம் மல்லுக்கு நிற்பது

எத்தனை பேருக்கு சொல்லிக் கொடுப்பது

உடலைத் திறப்பதால்

ஒருவரை அவமானப்படுத்திவிட

இன்னும்எத்தனை

நூற்றாண்டுகள்வரை

இம்மூடர் கூடம் துடித்துக்கொண்டிருக்கும்

தின்றால் பாவம் கொன்றால்போச்சு

எனத் தலைகீழாக்குகிறீர்கள்

யார்வீட்டுத் துக்கமும் ஒப்பாரியும்

உங்கள்தூக்கம் கலைப்பதேஇல்லை

வயிறுஎரிவதே இல்லை

ரயில் தண்டவாளத்திலோ

தூக்குக்கயிற்றிலோ

எவர்வீட்டுச் சுடரோ

இழுத்து அணைத்துப் போடப்படுவதைக்

கண்ணுற்றபோதும்

அகன்றதிரைத்தொலைக்காட்சியின்

துல்லியம் காரணமாகக்

காண்பதெல்லாம்

சேனல்காரன் போட்டியில்

வாங்கிய திரைப்படம் என்றா

நினைக்கிறீர்கள்

ஆயாசமாக என்றாசொன்னேன்

இல்லை

ஆபாசமாக எனத் திருத்திக் கொள்ளுங்கள்

சே...வாயாரத்

திட்டத் தோதாக

ஒருபோலிக் கணக்கையாவது

ஆரம்பித்துவிட வேண்டும்

முகநூலில்