நேடிவ்

 ஒருநாள்

ஒரே ஒருநாள்

விட்டுவிட்டுப் போனால்

முகத்தைத் திருப்பிக் கொள்கிறது வீடு

நேடிவ் போயிருந்தேங்க

அலைபேசியில் சொல்லிக்கொண்டே நடக்கும்போது

தலையில் நிலை இடித்தாற் போலிருந்தது

சொன்னவுடன்

சொல்கிறாள் தோழி

நீ பாட்டுக்கு ஊர்வீடு போல

நாமதான் குனியாம வந்துட்டோம்னு நினைக்காதே

எனக்கென்ன குறைச்சல்

கறிவேப்பிலைக்கொத்தேன்னு

நிலைதான் இறங்கிக்குட்டியிருக்கும்

இப்போது நானென்ன செய்ய

நம்புவதா

இன்னொரு முறை

"நேடிவ்ல ...."

சொல்லிப் பரீட்சிப்பதா

தூரத்தில் வேர் நுனி

புதிய பசிய கறிவேப்பிலையை ஈர்க்கிலிருந்து சரசரவென உருவி கொழுந்துமல்லித் தழைகளையும் சேர்த்துக் கொதிக்கும் ரசத்தில் போடும் கையா

நீரூற்றிக் களையெடுத்தது *********************************************

மழுமழுவென மின்னும் பீங்கான்

தொட்டியிலிருந்து கிள்ளிவந்த மணிபிளாண்டுக்கு

பழைய பால் பாட்டிலோடும் பேதமில்லை

*********************************************

நட்சத்திரம் இறைந்த துப்பட்டா வாங்கியபோது நினைக்கவில்லை

வானத்தை இப்படிப் போர்த்திக் கொள்ளமுடியுமென்று ************************************** தினம் நடக்கிற வழிதான்

தினம் வருகிற வெயில்தான்

என்றாவதுதான்

நிமிர்ந்து பார்க்க வாய்க்கிறது

கை வைத்து மறைத்தபடியாயினும்

*************************************

விதைத்தது நீ என்று உலகு அறியும்

வேரின் நுனி

உன் கையில்

என்ற ரகசியம் எனக்கு மட்டும்

நினைவில் வளரும் கறிவேப்பிலைச் செடி

கையை மாற்றி மாற்றிப் பற்றிக் கொண்டோம்

சுந்தரி டீச்சர் தொடங்கி 

நெட்டை கீதா குட்டை கீதா

நாங்கள் முதன்முதலில் பார்த்த

தேன்மிட்டாய்காரர் வீட்டு கிளிக்கூண்டு

ஒரு முழத்துக்குமேல் 

எப்போதும் வளராத கறிவேப்பிலைச்செடி

தெப்பக்குளக்கரை வளையல்கடை

கட்டுரைநோட்டு அடுக்கை

சாலைக்கு எதிர்புற வகுப்பறைக்கு 

எடுத்துச்செல்கையில் தவறவிட்டது

ஆச்சே....இருவது வருசம்கிட்ட

......ஒரு வருசம் பேசலாம் நம்ப கதைய 

எனச்சிரித்தபடி நகர்ந்தோம்

அப்புறம்தான் நினைவு வந்தது

வீட்டைச்சொல்லாது விடை பெற்றதும்

அவள் நெற்றித் தழும்பு

இப்போதும் தெரிந்ததும்....

மறந்துவிடாமல் குனிந்து நிலை தாண்டினேன்

அக்டோபர் 14 காமதேனுவில்