சிராத்துண்டு வரலாறு

 யாரோ நாற்காலி பற்றி

எழுதியிருக்கிறார்கள்

நாற்காலி படங்களாகக் காட்டி

என் விருப்பம் கேட்கிறது

இணையம்

இரண்டுபேர் உட்காரத்தக்க

அகலத்தின்

பழகிப்பழகிக் கருத்த

எங்கள் மரநாற்காலி

யார் யாரையோ உட்கார்த்தி

இறுதிப்பயணம் போன வரலாறு

ஒருநாள்

அடுப்பெரிக்கும் சிராத்துண்டாகி

முடிந்தபோது

அவ்வளவு மழமழப்பும்

உடையுமா எரியுமா

என வியந்த எங்கள் விழிகளுக்குள்

இவ்வளவு ஆண்டும்

உறுத்திக் கொண்டிருப்பது

இன்றுதான் தெரிகிறது

செதுக்க முடியாதவை

இரண்டுநிமிடங்கள் முன்னதாக
 உன் அழைப்பு வந்து நின்றதாக 
அலைபேசி சொல்கிறது
இரண்டு நிமிடங்களுக்கு முன்
இங்கேயே இருந்ததாக மனசும் அறிவும் 
சேர்ந்தே சொல்கிறது
கேட்டதா கேட்கவில்லையா
கேட்பாய்

இரண்டு நிமிடத்துக்குமுன்
என்ன நடந்ததென்று மறந்து போகிறதே
இந்த வரலாறு எப்படித்தான் எழுதப்படும்

எவ்வளவைத்தான் தஞ்சாவூர்க்
கல்வெட்டில் செதுக்கி வைப்பது