சொற்களின் சாவிக்கொத்து

வளைத்து வளைத்து நெளித்து மேலிழுத்து
எவ்வளவு தூரமும் கிளையை விரிக்கலாம்
ஓவியத்திரையில்

*********************************************************
எதுவும் சரியில்லையென்று சொல்லப்படும்போது
முனகல்கள் முழக்கங்களாகிவிடாமல்
கவனமாயிரு
ஒருநாள் அவதூறு
ஒருநாள் பழம்பெருமை
ஒருநாள் காமத்தூண்டல்
ஒருநாள் சிலை உடைப்பு
அவர்கள் எதைப்பற்றி பேசவேண்டும்
சொற்களைப்பூட்டி 
சாவிக்கொத்தை வைத்திருக்கும் 
நாம் முடிவு செய்வோம்
**********************************************
எழுந்துவிடுவேன்தான்
அதற்காக
ஒவ்வொருமுறையும்
தள்ளிவிடுவாயா
*************************************
அசரீரிகள் தேவைப்படும்
நேரத்தில்
அணைத்து வைக்கப்படுகின்றன
மற்றபடி பொழுதெல்லாம்
தெருநாய்க்குரைப்பு
**************************************
சீக்கிரம் முடிக்கச்சொல்லி
உத்தரவாகிறது
சீக்கிரம் என்பதை மட்டும்
தாஆஆஆஆஆமதமாகச்
சொல்கிறாய்
*********************************************

எதை எடுத்தாலும் பத்து

வானம் அத்தனை கறுப்பாகி விலக்கினாலும்
வெட்கங்கெட்ட விண்மீன்கள் 
பெயரையும் மாற்றுவதில்லை 
ஊரையும் மாற்றுவதில்லை

**********************************************************************

வண்ண வண்ணமாக
நிறைந்திருக்கிறது
சந்து முழுக்க
"எதையெடுத்தாலும் பத்து"
அங்காளியைக் காத்திருக்கச் சொல்லிவிட்டு
இந்தக் கூட்டத்தில்தான் கலந்திருக்கிறான் 

குடல்பலியாகப் போகிறவன்

வீட்டுக்குக் கொடுத்தனுப்பிவிட்டு
படுகளம் வந்து சேர்வானென
சூலத்தைக் கிடப்பிலிட்டு
விரித்த தலையை 

சற்றே ஆற்றிக்கொண்டிருக்கிறாள் அங்காளி

**********************************************************************

கடைசிப்பேருந்தையும்
தவறவிட்டுக் காத்திருக்கிறான் ஈசன்
காலந்தோறும் இப்படித்தான் 

எங்கோ நின்றுவிடுகிறேன்
எனப் புலம்பிவிட்டு
அக்கம்பக்கம் பார்த்துக்கொண்டான்
"பெருமைக்கொண்ணும் கொறச்சலில்ல.... காலபைரவனுக்கு "
அசரீரியாய்க்கேட்கிறது சங்கரி குரல்
அப்படியொன்றும் இல்லாதபோதும்