பலூன் சுருக்கு

 இருளில் காணாமற்போனான்

என்றிரங்கிக் கொண்டிருந்தவன்

வெளிச்சத்தில்தான்

காணாமற் போயிருக்கிறான்

நல்லாயிரு என விம்முவதா

துப்புவதா

குழப்பம்தான்

*******************************************

தப்பிக்க விரும்பும் காற்றுக்கு

மிதக்கும்

சோப்புக்குமிழ் வண்ணங்களின்

மேலொரு காதல்

பலூன் கழுத்தின்

சுருக்கல்லவா மனம் வைக்க வேண்டும்

***************************************************

சட்டென கற்றுக்கொண்டு விடுகிறேன்

முட்டைக்கோஸ்

சௌசௌ

சகலத்திலும் சட்டினியரைக்க

ஆனால் வெங்காயமென்னவோ

உன்னைப்போல்தான்

நீங்காஇடம்

**********************************************

தளராடைவேளை

மாற்றிப்போட்ட சேலையின் ஓரப்பிசிறுவழி
கொடியிலிருந்து சொட்டிக் கொண்டிருக்கிறது
வெளியில் நான் விட்டுவந்த
மழை

கேட்கவேண்டும் எனத் தோன்றும் பாடல்கள்
எதையும் தேட நேரமில்லை
மெழுகுவத்தி கரைந்தே விடுமோ என்ற அச்சத்துடன்
ஊதிஊதி அணைத்து அணைத்து
ஏற்றிக் கொண்ட இரவுகளுக்கு
இருந்த வாசம்
இன்றைய நாசியில் அரூபமாய்

இறுக்கமாய்த் தோள் சார்த்திய வயலினை
இழைக்கும் விரல்களை நினைத்தபடி
வெங்காயம் நறுக்கும்
இந்த தளராடைவேளையின் பரபரப்பு
என்றாவது மணக்கக் கூடும்