கட்டுக்குள்

 என்னா வெயிலு

என்றபடி

கீரைக்கட்டுகளின்மேல்

தண்ணீரைத் தெளிக்கிறாள்

அந்த லோட்டாவை வாங்கி

அவள் வாடிய முகத்தின்மேல் தெளிக்க மாட்டோமா என்றிருக்கிறது

மனசுக்குள்

வாய்

இருவத்தஞ்சா அநியாயமால்ல இருக்கு என்கிறது

அடங்காப்பிடாரி

*******************************************************

ஒரு உழக்கு பாலின்

வெண்மை தளர்ந்த சாடையின் இறுதிக்கோட்டைத்தொடுமளவு

விளாவிய தேநீரை

அளந்து அளந்து எல்லோருக்கும் தந்தபிறகான

வண்டலைக் குடித்தே பழகிய அம்மா சொல்கிறாள்

எனக்கு சூடே ஆவறதில்ல என்று

ஏட்டையாவது எடுத்துப்போடு

அப்புறம் அதற்கொரு சாக்கு கண்டுபிடிக்க வேண்டும்

எண்கரத்தாள்

 கடிகாரத்தாலோ நாட்காட்டியாலோ புதிய நாள் புதிய காலம்

முகக் கவசத்தின் காதை

காதோடு தொங்கவிட்டுக்கொண்டு

பீடி பிடித்தபடி வம்பளந்து கொண்டிருக்கும்

பணியாளர் கூட்டம்

வியர்வையை முந்தானையால் ஒற்றிக்கொண்டு வாடிக்கையாளர் குரலுக்கெல்லாம் நீளும் எண்கரத்தாள்

காற்றிலாடும் நிறநிறநிறப் பொட்டலங்கள்

கிழமை தெரியாது சுழலும் இந்தக்காலம்தான்

நிகழ்காலம் அவளுக்கு

ஒருநிமிடம் இடைவெளி கொடுத்தீர்களானால்

அந்த தம்ளரில் ஆறிக்கிடக்கும்

தேநீரால் தொண்டையை நனைத்துக்கொண்டு கேட்பாள்

என்னங்க வேணும்

கால்வலிக்க நிற்கும் அன்பு

 

நீர்த்துப்போ
நீர்த்துப்போ
அகங்காரமே
கதவைத் தட்டிக்கொண்டே 
கால்வலிக்க நிற்கும் அன்பை
சமாதானம் செய்வது என் பாடு

********************************************

இன்றைய தேநீர்
நன்றாக அமைந்துவிட்டதா
அற்புதங்களை நிகழ்த்திக் கொண்டிருப்பவனே
நீ ஏன் உடனருந்தும்படி 
யாரையும்
அழைப்பதில்லை
**************************************

மதிலுக்கு
அந்தப் பக்கமிருந்து
ஒவ்வொன்றாக வந்து விழுகின்றன
உன் உடைமைகள்
ஒட்டுமொத்தமாக
நீ
குதித்தால் என்ன

தேநீர் நேரம்

 கொதித்துக் கொண்டிருக்கும்

தேநீரிலிருந்து

தப்ப விரும்பிய தூளை

நாளைய தேநீருக்காக

இறுக்கி மூடிவைத்தேன்

**********************************************************

காய்ந்த இலைகளின் மொடமொடப்பு

கறுப்பாக ஊறி ஊறிக்

கொதித்துக் கொண்டிருக்கிறது

உன் தேநீர்தயாராகும்

வரை

காத்திரு

**************************************************

சிறு நூல்வழி

ஆட்டிப்படைக்க முடிகிறது

மலைவிளைந்த தேயிலையின்

கடைசித் தருணத்தை

இறுமாப்புதான்

*******************************************

கோப்பைகளின் அளவைத்

தீர்மானித்தவனுக்கு

ஒரு கரண்டியா

இரண்டு கரண்டியா

எனக் கேட்பது பதில்முறை

**********************************************

கண்ணீர் நதிசூழ் அறை

ஒரு மழைமாலை
இருளும் குளிருமாக இருக்க வேண்டும்
நீ அண்ணாந்து பார்த்தவுடன்
நட்சத்திரங்கள் மின்ன வேண்டும்
அப்புறம் மொறுமொறுவென ஏதாவது
கொதித்த மணத்தோடு தேநீர்
சரி
உனக்கே தெரியும்
இதெல்லாம் இதே நியமத்தில் வராதென்று
மைக்கை மாற்றிக்கொடு
வேற...வேற...
******************************************************
இடுங்கிய கண்ணும் உதடுமாகச் சிரிக்கும்
மகளின் பிறந்தநாள் கொண்டாட்டத்தை 
நேரலையாகப் பார்க்க முடிகிறது
மனசு பொங்கினால் போதாதா
கண்களும் சேர்ந்து கொள்ளணுமா
" அப்பா....காமராவைச் சரியா வைங்கப்பா....
முகத்தைத்தவிர உங்க ரூமெல்லாம் தெரியுது..."
சிணுங்கிச் சிரிக்கிறாள் பெண்ணரசி
இனி
பக்கத்திலொரு கைக்குட்டை 
வாகாக வைக்க வேண்டும்
*********************************************************

அதட்டலின் வேகம்

கனக லக்ஷ்மி என்ற பெயர்
தன்னைத்தவிர
வேறு யாருக்கும் இருக்காது என்றாள் என் பள்ளித்தோழி
இன்று ஒருத்தி
வரிசையில் எனக்கு முன் நின்றிருந்தாள்
அவள் எண் 17
நான் 18
17 அழைக்கப்பட்டது
அவள் சென்றாள்
கனக லக்ஷ்மியா என்றார் அழைத்தவர்
இங்கிருந்தே நான் இல்லை 
எனச் சொல்லிக்கொண்டேன்
அவள் எண் 17 என்றே இருக்கட்டும்

*****************************************************************

எழுதப்படாத குறிப்பு
ஒன்றை வைததிருந்தேன் உன்னைப்பற்றி

ஓரெழுத்தும் பொருந்தாது 

எனப்புரிந்தது நேரில் கண்டபோது

குறிப்பின் உடையவனைக் 

கற்பனைக் கதாபாத்திரமாக்கிவிட்டேன்
இனி எழுத்துகளை எச்சரிக்கையாகக்
கோர்க்கவேண்டும்

**********************************************************

உங்கள் தேநீரில்
உங்கள் பெயரெழுதி வருகிறது
நிறம் மணம் திடம்
எல்லாமே யார் தீர்மானத்திலோ
உனக்கு வேண்டியது தேநீர்தானே
அதட்டலின் வேகத்துக்குமுன் விழுங்குவது என்றாவது ஒருமுறை
சொல்லிவிடுங்கள்
நிறம் மணம் திடம் இனி என் தீர்மானம் என்று

செட்

நிறைய கோப்பைகள்
சேர்ந்துவிட்டன
அடுக்கி வைத்தேன்
தட்டோடு
தட்டின்றி
பிடியோடு
பிடியின்றி
பூப்போட்டு
பொன்னிறக்கோடுகளோடு
கண்ணாடி,பீங்கான்,
எவர்சில்வர்....

ஆறு ஆறாக வைப்பது
எவருடைய யோசனையோ

எந்த ஆறிலிருந்தும்
கலைக்க முடியாமல்
ஒற்றை தம்ளரில் வார்த்த தேநீர்
ஏடு படியாது பருகுதல் என் வழக்கமானது

வருவதென்றால் தயவுசெய்து
ஆறு பேராக வரவும்

எதிர்பார்ப்புகளின் கண்ணாமூச்சி

கண்டிப்பாக மீசை வைத்திருப்பார்
 என நினைத்திருந்தவர் வந்து 
பெயர் சொன்னபோது 
இதற்குமேல் வேண்டாமெனத் தோன்றுகிறது..
பேசுகிறார்.
எத்தனை கற்பிதங்களை நொறுக்குவது?
யாராவது வந்து உட்காருங்கள்
நான் தேநீர் தயாரிக்கப்போகிறேன்

ரோஜா தேநீர்

இவ்வளவு சர்க்கரை இன்ன நிறஅளவு
இவ்வளவு திடம்
என்று தனது
விருப்பத் தேனீரை 

அடையாளம் காணவும் நிதானமாக அருந்தவும்
உங்களைப்போல
தெருமுனைக்கடை வரையல்ல
நூற்றாண்டுகளைக் கடந்து
நடந்திருக்கிறாள் உங்கள் பிரியசகி

காதலைச்சொல்ல
ரோஜா வேண்டாம்