மரணம்
எங்கே உட்கார்ந்திருக்கும்
அரட்டையடிக்க தோதாக விடலைகள் அமரும்
ஊர் மதகுகளில் வந்து உட்கார்ந்து
நிலவொளியில்
பேரேடு திருப்புமா
பழைய அரைவேட்டியை
முண்டாசாக்கி
அலக்குக்குச்சியை
ஊன்றுகோலுமாக்கி
கண்மறைத்து
ஆடு எண்ணும் மேய்ப்பனிடம்
எண்ணிக்கை பழகுமா
கிறீச்சு கிறீச்சென
பழைய துருவியில்
வளைத்து வளைத்து
ஒட்டதுருவியெறிந்த
கொட்டாங்குச்சி சாய்ந்து கிடக்க
தேங்கிய கோடைமழையைப் பருகி தாகசாந்தி பெற்றபடி
அன்று உடைபடப்போகும்
பானைகளுக்காகக்
காத்திருக்குமா
இடம் தெரிந்தால்
நாக்கைப் பிடுங்கும்படி
நாலு கேள்வி கேட்கலாம்
