கொரோனா வாழ்க்கை

 

கொரோனா வாழ்க்கை 

பசி மிஞ்சி
குடல் இறுக்கும்போது
காத்திருங்கள்
அரண்மனை போலொன்று
ஆகாயத்தில் மிதக்கும்
கையசைத்தபடி ஏறி வருவார்கள் 
எவ்வளவு பசிக்கிறதென கணக்கெடுக்க
உளவு பார்க்கிறதோ என
ஓடி ஒளியாதீர்கள்
அப்புறம் உங்கள் பசி
கணக்கில் வராமலே போகும்

*****************************************

 ஒவ்வொருவரிடமும்
ஒரு தாளை வழங்கியது
அக்கிருமி
ஒவ்வொருவரும் தமது பங்காக சிறிது
நஞ்சைத் தோய்த்தனர்
ஒவ்வொரு வீட்டுக்குமாகப் 
பிரதி அனுப்பி முடித்தும்
மிச்சமிருக்கிறது நஞ்சு
அதற்கென்ன 
அடுத்த வாய்ப்பு இல்லாமலா போகும்

 *******************************************

கழுவிக்கழுவிக் கைகளுக்கென்று
பிரத்யேக வாசமேயில்லை

கைகழுவித் திரவ வாசனை
வீட்டில் அரூபமாக மிதக்கிறது

அதன்மேல் நடந்து
அதோடு கைகலந்து
அதோடு புரண்டு

அதோடு உறங்கி
அதையே கொப்புளித்து....

பானங்களின் சுவையை மாற்றிவைத்தவன் யார்

***************************************************

 

வட்டங்களுக்குள்
நிற்கப்பழகு
ஆரத்தழுவாதே
அளவாய்ப்புன்னகை செய்
தூரதூரமாய் நில்
தொட்டுப்பேசாதே
முகத்திரை மறவாதே
ஒரு பை எடுக்க மறந்தவர்க்கெல்லாம்
புகுந்தவீடு போகும் பெண்போல் பாடம்
எதுவும் ஏறாதபோது
எதிர்த்தெருவில் ஒருவர்க்கு
என்றால்போதும்

கனவின் சீதனம்

இந்த முகத்தை மறந்திருக்கவே கூடாது
ஆயினும்
எங்கேயோ பார்த்த சாடையிலும் 
ஒருநாள்
தோன்றுகிறது
*****************************************************

கனவுகளுக்கு அர்த்தம் உண்டா என்ன
நினைவுக்கே இன்னும்
தெரியாதபோது

*************************************************

கூரையில் வழிவதற்கும்
சன்னலில் இறங்குவதற்கும்
வேறுபாடு தெரிகிறது
மழைக்கு
சப்தத்தாலும் ருசி

************************************************
அத்துணை நஞ்சையும்
அள்ளிப்பருகச் சொல்லும் வாழ்வை வாழ
ஒரு கோப்பை சீதனம்
தந்தது நீயா
*******************************************

கட்டிடங்களிலிருந்து வெளியேறிவிடலாம்
கட்டுகளை என்ன செய்ய
முளைக்குச்சி அத்தனை ஆழம்
கட்டுக்கயிறு அத்தனை இறுக்கம்

******************************************************