அருகிலிருக்கும் யுகங்கள்

பாதி மினுக்கு மட்டும் தெரியும் நட்சத்திரம்
வியப்பாகப் பார்க்கிறாய்
பாதி சந்திரன்
பாதி சூரியன் போலத்தானே பாதி நட்சத்திரம்
அவ்வளவு ஏன்
என்னைக்கூட
பாதி(?)தானே அறிவாய்
என்ன சொல்லியும் பிடிவாதமாக 
அந்த நட்சத்திரத்தையே 
பார்த்துக்கொண்டு நிற்கிறாய்
உனக்காகவாவது 
கொஞ்சூண்டு மேகம் நகர்ந்துகொண்டு 
முழுமையான மினுக்கைக் 
காட்டிவிட்டாலென்ன
ஆயாசமெல்லாம் பலிதமாகிவிடுமா

**************************************************************
யுகங்கள் என்பது
தூரதூரமாகவும் இருக்கலாம்
கசிந்த கண்ணீரை
கசியாது மூக்குறிஞ்சி விழுங்கிவிட்டு
தலைநிமிர்கையில்
ஒரு புன்னகையை உதிர்க்கும்
அருகாமையிலும் இருக்கலாம்
*********************************************************
செண்பகமும் கொடிசம்பங்கியும் 
அபூர்வமோ அபூர்வம்
எங்கிட்டயும் ஒருமுழம் வாங்கக்கூடாதா
என்று இறைஞ்சுபவள் 

கையில்தான் சரம்

சாலையோர அங்காளம்மை-2

முழம் முழமாய்ச் சுற்றி வைத்த பந்துகளிலிருந்து
ஒரு கிள்ளு கூடத்தராது ஒயர்கூடையில் பதுக்கியபடி
தன்னை வணங்க காசு வீசும்
வாகனதாரிகளை மறித்துவிட்டு
பேரத்தின் எரிச்சலை வெற்றிலை எச்சிலாய்ப்புளிச்சிடும்
பேச்சியின் பேச்சும் கூவலும் 
அத்துணை சுவாரசியம்
எவரோ எப்போதோ சார்த்திய
மஞ்சள் சுங்கடியில் சான்னித்தியம் அருளும் 
அங்காளிக்கு