காந்திமதியின் சொத்து

அடகுக்கடை
ரசீதுகளை மடித்து ஒடுக்கிய
உள்ளூர் நகைக்கடை பெயரழிந்த நைந்த
மணிபர்ஸ்
காந்திமதியின் மாபெரும் சொத்து

அரிசிபருப்பு 

அஞ்சரைப் பெட்டியெல்லாம் 

அலசி எடுத்துவிட
டாஸ்மாக் தந்திரங்களைப் 

பயின்ற கணவனால்
எப்போதும் வியர்வையில் ஊறிய 

ரவிக்கைக்குள் அடைகாப்பாள் 

இல்லப் பொருளாதாரம்

சாகாவரம் பெற்ற
வறுமைக்குப் புட்டிப்பால் 

அவள் சுண்டியெறிந்த கண்ணீர்

சிரித்தபடியே 

இறுக்கிக்கட்டும் துடைப்பத்துக்கு 

அவள் வாழ்வின் குப்பைகளைக் 

கூட்டியெறியத் தெரியவில்லை

காந்திமதி கேட்கிறாள்
கட்டி கட்டியா நவ( நகை) போட்டுக்கிட்டு வாராவளே 

அவங்க ஊட்டுல தங்கம் காய்க்குமா

சிம்மக்குரல் பித்தன்களும் அங்காளி சன்னதியும்

உக்கிரம் என்பது
அவளைப்பற்றிய சித்திரம்

மண்டையோட்டில் 

இரவலர் வாழ்வை ஏந்தி ஆடும் 

பித்தனும்
நில்லாதே செல்லாதே 
என்று கட்டளையிடுகையில் 

சிம்மக்குரல் பெற்றுவிடுகிறான்

கொங்கையொருபுறம்
மங்கையொருபுறமுமாக
உதிர உதிர
எதிர்த்தாண்டவம் ஆடிய
காலங்கள் தாண்டி
டாஸ்மாக்கிலிருந்து திரும்பும் 

பின்னிரவுப் பித்தன்களின்
தாண்டவம் 

அடுப்பைக்கூட உக்கிரமாக எரிய 

அனுமதிக்கவில்லை

அவளுக்கு ஆறுதல்
அங்காளி சன்னதிகள்

கொஞ்சம் காக்கரட்டான் மல்லியும் 

அள்ளிப்பூசிய நிறமுமாக
வேறுமாதிரி 

ஒருநாளாவது இருக்கவைக்கும் 

அங்காளியைப பார்த்துதான் 

இப்படி ஒரு புன்னகை
இன்று என் மூக்குத்திக்கும் உன் நிறம்தான் என்று

ரௌத்திரத்தின் விலை

ரௌத்திரம் பழகவும்
தலைக்கொரு விலையுள்ள தேசமே 
தண்ணீர் நின்றாலென்ன
தரை வெடித்தாலென்ன
தவறாது 
டாஸ்மாக் செல்
சீரியல் பார்
குத்துப்பாட்டு கேள்
யாரையாவது நோக நோக மீம்ஸ்
போட்டுச்சிரி
பெண்ணின் படம் வரைந்து பாகங்களைக்குறி
உளறல் பகிர்ந்து பரவசமடை
தின்று எறியும் குப்பையுணவுக்குப்பைகளின் மேல் 
வளராதா என்ன
நாகரிகப்பயிர்