உயரத்துக்கென்றே

திரும்பத்திரும்பச் சொல்ல வேண்டாமே 

என்றுதான் தேடித்தேடி மலையேறியது
குகையிடுக்குகள் சீக்கிரமே
அலுத்துவிடுகிறது
எதிரொலி வேண்டி
திரும்ப ஏறமுடியாதோ என்ற 

அயர்ச்சியில்தான் நின்றுவிடுவது

உயரத்துக்கென்றே சில தாழ்ச்சி

எங்களுக்கென.....

பேசத்துவங்குமுன் சற்றே
தொண்டை கமறுகிறது
உனது சொற்களா எனதா
எதைத் துப்புவது என்ற
தள்ளுமுள்ளுதான்
இதற்கு விக்ஸ் என்செயும்
ஸ்ட்ரெப்ஸில்ஸ் தான் என் செயும்

*************************************************

நீங்கள் நம்பவே போவதில்லை
எங்களுக்கென்று ஒரு உயரம்
இருந்ததையும்
எங்களுக்கென்று ஒரு துயரம்
இருப்பதையும்

கண்ணீராலாவதென்ன

***********************************************

கதவைத் தட்டுபவர்கள் என்று
யாருமே இல்லை

மின்சார அழைப்புமணி 

வைக்கத்தொடங்கிய பின்னும்
கதவைத்தட்டி அழைப்பவர்கள்
கதவைத்தட்டி நுழைபவர்கள் இருந்தார்கள்
அப்படி யாரும் தட்டாத
பொழுதுகளிலும்
தட்டிய ஒலியின் பிரமையில்

திடுக்கிட்டு எழுமளவு
கதவைத் தட்டும் ஒலி நம் இதயத்தில்
கேட்டுக்கொண்டிருந்தது
இங்கோ தட்டுவதற்கானதல்ல கதவு
என்பதில் தெளிவாக இருக்கிறார்கள்
எப்படி நுழைகிறார்கள் என்பதுதான்
தெளிவாகவில்லை