நான் என்ன செய்வேன் என் தேவனே

 என்றைக்காவது

தற்கொலை செய்து கொள்வேன் என்றாள் அவள்

எப்போது என்றோ எப்படி என்றோ

தெரியாத ஒன்றை சர்வநிச்சயமாக நிகழப்போகும் பாவனையில்

சொல்லும் அவளை வெறித்துப் பார்த்தேன்

ஆனால் அதற்கு சற்றுமுன்

ஹரிபிரசாத் சௌராஸியாவைக்

கேட்டபடி

இரண்டு பாஸந்தி சாப்பிடுவேன்

என்கிறாள்

என்றாவது எதுவும் நிகழ்ந்துவிட்டால்

இந்த வரிசையில்

நடந்ததா என்று சரிபார்க்க வேண்டுமா

அல்லது

இதுகூட நிறைவேறாமற் போய்விட்டாயே

என்று அஞ்சலி எழுத வேண்டுமா

இப்படித்தான் யாராவது

புதிய கவலைகளை ஏற்றி வைத்து விடுகிறார்கள்

சமூகத்தின் தற்கொலை

சொற்கள் பேசமுடியாத போது 
மௌனம் நிறையப் பேசுகிறது
அந்த இரைச்சலைப் புறக்கணிக்கும் சமூகம் 
எதையும் கொலை செய்யும்
அது தன் தற்கொலை என்பதையும் உணராது
*****************************************************************
நீங்கள் என்ன சொல்வீர்கள் 
எப்படி வருந்துவீர்கள்
எவ்வாறு உணர்வீர்கள்
எதில் அவமானமடைவீர்கள்
எங்கு உங்கள் கண்ணீர்த்துளி
வீழும்
கையூன்றியாவது எழ இயலுமா
இப்படியெல்லாம் கரிசனம் கசியுமென்றா நினைத்தீர்கள்
மின்சாரம் பாய்ந்துமா....
******************************************************