பாப்பூ -2

 பேசவைத்து

ஆடவைத்து வீடியோ எடுக்கும்

அம்மா

அப்பாவுக்கு

முன்னமே

தயாராகிவிடுகிறாள் பாப்பு

புதிய ஒன்றைச் செய்தவுடன்

புதிய உடையோடு

***********************************

பூப்பூவாய், ரிப்பன் கட்டி, வழுவழு சாட்டினில் குய்ங் குய்ங்கென அடிவைக்குந்தோறும் கூவும்படியாக விதவித காலணிகள் இருந்தாலும் அம்மாவின் பாதணிக்குள் ஏறி நடக்கத்தான் பாப்புவுக்குப் பிடிக்கிறது

பாப்பூ -1

 

தினமும் சன்னலுக்கு வரும் காகத்துக்கு
ஒரு பிடி சோறு வைத்துப் பழகிய
பாப்பு
காக்காஃபிரெண்டாக
சொல்லிக் கொடுக்கிறாள் 
பக்கத்துவீட்டுத் தோழனுக்கு
*************************************

 

பிரௌன் நிறத்தை
அரைத்தீற்றலாக இழுத்து வைத்த பாப்பு
அங்குமிங்கும் குனிந்து நிமிர்ந்து
தேடிக்கொண்டிருந்தாள்

பச்சை பென்சிலைக் காணோமாம்

பிரௌன் மண்ணில்
செடி எப்படி முளைக்கும் விசனத்தோடு
தேடல் தொடர்கிறது

அங்குமா
அலுத்துக்கொண்டார் தாத்தா

 ************************************************************

தலைக்குள் மத்தாப்பூ

 கொஞ்சம் சின்னதுதான் ஆனாலும் ஒரு காகிதக்குல்லாவை தலைமேல் பாவனையாக வைத்திருக்கையில் வந்துவிடுகிறது சற்றே பாப்புவின் சாயல்

இது பாப்புவா நானா என்று கேட்டுக்கொண்டு வராதீர்கள்

அவளுந்தான் பட்டென்று கன்னத்தில் கைவைத்தபடி நானாகிவிடுகிறாள் ******************************************

என்னவோ சொல்லப்போகிறேன்

என்று காத்திருந்துவிட்டு

உதிராத வசவு

தலைக்குள் சுழலச்சுழலப் போனாய் பார்

மத்தாப்பூதான்

உக்கிரத்தின் நதிமூலம்

 சுருள்பொட்டலமாகக் காத்திருக்கும் செம்பருத்தி வெண்ணிலவின் சிரிப்பினைக் காணாதும் பிரதி செய்து விடுகிறது மலர்ச்சியை

உன் உக்கிரம் ஒவ்வொன்றுக்கும்

நதிமூலம் எதுவோ

********************************************

சொப்புச்சாமானில்

பாவனையாகத்

தயாராகிக் கொண்டிருக்கிறது

விருந்து

பாவனையாகச் சாப்பிட்டு முடிக்கும்

விடுதலை நோக்கி காத்திருக்கிறாள் பாப்பு

பாவனையாகச் சமைத்து முடிக்கும்

விடுதலை நோக்கி அம்மா

கண்ணாடியில் தெரியாத வானவில்

 

கண்ணாடியின் ஓரத்தில்
சிறுதுண்டு வானவில்
மற்ற நீ எங்கே

***************************

 நெளிந்து நெளிந்து
இறங்கும் வெயில்
சற்றே படிக்கட்டில் இளைப்பாறுகிறது
அந்திமந்தாரை காத்திருக்கிறது

************************************* 

சிறுகுவியல் மணலுக்குள்
போய்ப்போய் அளைந்த
விரல்களை
பாப்பு
எங்காவது
பத்திரப்படுத்தவேண்டுமாம்

************************************

 உன்திரையின் பின்னே
நீயும்
என் சன்னலில்
நானும்
பரல்கள் உருள்கின்றன நடுவீதியில்

********************************** 

நீ வரையாவிட்டால் என்ன
தீர்ந்தா போய்விடுகிறது
நெடுங்கோடு

**********************************

 பகலைப் பிழிந்த சாறு
தயாராகிறது
அவரவர் கோப்பை
அவரவர்க்கு

 

 

 

 

தாளுக்குக் குறுக்கே

 பாப்புவுக்கு

ஒவ்வொரு சீசன்

ஒரு நிறத்தைப் பிடிக்கிறது

நன்றாகத்தான் இருக்கிறது

வெள்ளை சூரியன்

அப்படித்தான் சொன்னாள்

ஒரு முழுத்தாளை

குறுக்கே விரல் நீட்டுங்கள்

சுடும்

ஒப்புக்கொள்வீர்கள்

நடுவில் ஒரு வரி

அப்படியொன்றும் 
காணாமல் போய்விடமுடியாது
ஒரு பச்சைஒளிவட்டம் 
உனது இருப்பைக் காட்டிவிடும்
அப்படித்தான் தொலைய வேண்டுமானால் 
முதலில் நீ எவரோவாக 
கூடுபாய வேண்டும் என்றேன்
தொலையவேண்டும்
என முடிவு செய்தபின்
இன்னொருவராக 
இருக்க வேண்டியதென்ன என்றான்
********************************************************
ஒரேமாதிரி ஓடுவது
பாப்புவுக்குப் பிடிப்பதில்லை
தள்ளாடுபவன்போல்
காலை இழுத்து இழுத்து ஓடுவது
நொண்டி விளையாட்டுபோல 
ஒற்றைக்காலோடு 
தத்தித்தத்தி ஓடுவது
இரட்டைவரிநோட்டுபோலச்
 சாலையைப் பாவித்து 
நடுவரியை விட்டுவிட்டு 
தாவிக் குதித்தபோது வேண்டிக் கொண்டேன்
நடுவில் ஒருவரியை விட்டுவிட்டுக் 
குதிக்கக் கற்பிக்குமாறு
சரியெனப்
ப்ராமிஸ்' செய்திருக்கிறாள்

தோ தோ

எல்லோருக்குமான
துன்பங்களையும்
தவிப்புகளையும்
சிரிப்புகளையும் நிற்கவைத்திருக்கும்
கௌண்டரில்
அவர்கள்
தோள்மீது ஏறித்தாண்டி
டிக்கெட் எடுத்து விடுகிறவர்கள் 
இப்போதும் இருக்கிறார்கள்.
நெரிசலைப்பற்றி
நீங்கள் புலம்புகையில் 
அவர்கள்தான் 
அமைதியாகக் கேட்டுக் கொண்டிருக்கிறார்கள்
**************************************************************

புளித்துவிட்ட பண்டத்தை 
நாய்க்குப் போடுவதுபோல
வாழ்க்கை எதையாவது போடும்
தோ தோ கூப்பிடவே அவசியமில்லை
இந்த நாக்குதான் 
தொங்கிக்கிடக்குதே

**************************************************************



பாப்பு கால் வலிக்கிறதென்று
 சிணுங்கியபடியே உறங்கிப்போனாள்
குழந்தைகள் தினத்துக்காக 
ஊர்வலம்
*********************************************************


அதிசயங்கள்
அதிகம் பேசும்
கொஞ்சும் குழந்தைகள்
மிரட்டும் அறிவியல்
சாதி மதம் வளர்ப்பு ஒழிக்க
சிரிக்க வாசிக்க வம்பு பேச
தனி ஆள் குழுவென 
ஒவ்வொன்றையும் 
இருபத்தேழுமுறை அழிக்கிறேன்
ஆக
ஒருநாள் இந்த அழித்தொழிப்பே மிஞ்சும் போல

பெற்றதும் கற்றதும்

காதோரம் வழிந்துகொண்டிருந்த 
வியர்வையைத் துடைக்காமல்
நூறு உதிரிமல்லியும்
ஒரு குட்டி தர்பூசணியுமாக
தேர்வு முடிந்த பேத்தியைப் பார்க்க 
பேருந்து நெரிசலிலிருந்து 
இறங்கிப்போகும் அவள் பின்னால்
 நாய்க்குட்டி போலப் போய்க்கொண்டிருக்கிறது
எங்கள் ஊர் வெயில்
*********************************************************
பாப்பு விட்டுப்போன
குரங்குபொம்மை
தேர்க்கடையில் வாங்கிய பஞ்சுபொம்மை
சொப்புச்சாமான் அந்தஸ்து பெற்ற 
வீட்டின் தட்டுமுட்டு சாமான்கள்
நினைவாக எடுத்து வைத்து
விடுமுறைக்குத் தயாராகும்
தாத்தாவின் கவலை
எங்கோ ஓடிப்போய்விட்ட வெள்ளைப்பூனை
இடுகாட்டில் குடியேறிவிட்ட
மனைவி
இரண்டுநினைவிலும் அழுதால் 
எப்படி சமாளிக்க?
******************************************************