தரும மருமம்

 நசுங்கிப்போன பித்தளை கூஜாவைப் போட்டுவிட்டு எவர்சில்வர் கூஜா வாங்கிவந்தபோதே வீட்டில் அவ்வளவு வரவேற்பில்லை

அன்று

பள்ளியில்

ரயிலடியில்

தெருமுனையில்

மைதானத்தில்

குழாய்களில் கைகுவித்துப் பருகுவதில் தயக்கமில்லை

தயங்குபவர்க்கு

அருகமை வீடுகளில்

ஒரு லோட்டா தண்ணீர் உபசாரமுண்டு

நூற்றிலொரு குழந்தை

தோளில் நாடா தொங்க பிளாஸ்டிக் குடுவைகளோடு பள்ளி வந்த அதிசயம் தொடங்கியது

தங்கம் கூடத் தருவார்

தண்ணீர் தரமாட்டாரென்ற வாழ்வு நிலைப்பட்டு விட்ட மண்ணில்

தண்ணீர்ப்பந்தலும்

தர்மமல்ல

போத்தல்களில்

குடுவைகளில்

விற்ற நீரை

ஆற்றோடு

குளத்தோடு

அரசுகளே விற்கும் காலம்

கூஜாவைப் படம் போட்டு

பார்த்திருக்கிறாயா எனக் கேட்கிறது இணையம்

சிராத்துண்டு வரலாறு

 யாரோ நாற்காலி பற்றி

எழுதியிருக்கிறார்கள்

நாற்காலி படங்களாகக் காட்டி

என் விருப்பம் கேட்கிறது

இணையம்

இரண்டுபேர் உட்காரத்தக்க

அகலத்தின்

பழகிப்பழகிக் கருத்த

எங்கள் மரநாற்காலி

யார் யாரையோ உட்கார்த்தி

இறுதிப்பயணம் போன வரலாறு

ஒருநாள்

அடுப்பெரிக்கும் சிராத்துண்டாகி

முடிந்தபோது

அவ்வளவு மழமழப்பும்

உடையுமா எரியுமா

என வியந்த எங்கள் விழிகளுக்குள்

இவ்வளவு ஆண்டும்

உறுத்திக் கொண்டிருப்பது

இன்றுதான் தெரிகிறது