இடிக்கும் நிலை

சண்டை சிறிதாயிருக்கும்போது
உன் குறைகள்
எதுவும் விட்டுவிடாமல் நினைவூட்டிக் கொள்கிறேன்
தூபக்காலில் வம்பாடுபட்டு
மூட்டிய தணலை
அள்ளிப்போட்ட சாம்பிராணித்தூளே 
அவித்துவிடும் எனத் தெரிந்தபோதும் கூட

****************************************************************************
பிடித்த நிறம்
பிடித்த உணவு
பிடித்த பானம்
பிடித்த தீனி
உன் எல்லாப் பட்டியலும்
நினைவு தெரிந்த நாளாக
மாறுதலின்றி இருக்கிறது
அலுத்துக் கொள்வதெல்லாம்
சும்மா
சரி நீயாவது அப்படி இரு
*******************************************************************

குனிந்தபடி நுழைந்தபோது 

நிலை இடிக்குமெனக் காரணம் இருந்தது

அவள் உயரம்
நிலையை என்றும் இடிக்கும்படியும்
குனியும்படியுமே வைத்தது

**************************************************************

நீட்டிய கைகளோடு
நீ வருவதான கனவு
பரந்த பேரன்பின் குளிர்ச்சியை 

வருந்தோறும் உணர்த்திக்கொண்டே இருக்கும்

பாறைகளின் மேல் கோடையருவித் தடமென
நிஜத்தில் உன் விரல்கள் மட்டுமே நீள்கின்றன
ஒடுங்கிப்போய்விடும் பரிவைச்சுட்டியபடி
எப்போது நுரைக்குமோ

இலை அழுத துளி

அதெல்லாம் அப்பவே மறந்துட்டேன் 
என்கிற 
உன் சொல்லில் நிற்கிறது முள்

*****************************************************

செம்மண் பள்ளமெங்கும் நீர்
இறைத்து ஊறியதோ
இரைந்து ஊறியதோ
***********************************************
சரளைக்கல் நொறுங்க நொறுங்க 
குறுக்கு மறுக்காக 
ஓடிக்கொண்டிருக்கின்றன சக்கரங்கள்
பூசி மெழுகியபின் வரலாம்
உறுத்தாது
*******************************************************

எத்தனை துளிர்க்கையிலும் 
மலரா முகத்துக்காக 
இலை அழுத துளி 
மழை மாலையில்
************************************************************

ஒரு இளஞ்சிரிப்போடு
கடந்துவிடுகிறீர்கள் பேரன்பை
கொடுஞ்சொற்களுக்கு தாரை வார்க்க 

முழு இரவை ஏந்தியபடி

***************************************************

உரசுகிறது வேர்
துண்டுப்பலகையின் துணையில் 
பள்ளத்தைக் கடக்க முடிகையில்

*****************************************************************

சாயமிழந்த சிற்றாடைப்பூ

குடைஜிமிக்கியின் ஓரச்சலங்கைமுத்து 

அளவே உள்ள அன்பைப்
பேரன்பு
என்கிறாய்
கோயிலின் கண்டாமணியையே
ஒத்துக்கொள்ளாத உலகத்திடம்

தருவதின் அளவும் 

பெறுவதின் அளவும் உணர்வதன் நாழி நிறை

தன்னைத்தானே 

சுற்றிச்சுழன்றாடும் சிறுமியின் சிற்றாடைப்பூ
சாயமிழந்த மலர்ச்சிக்கு முன்
ரங்கராட்டினத்தின் சக்கரம் சிக்கிக்கிடக்கிறது