பேருந்தில் இறங்கிய சிரிப்பு

நகைக்கடை துணிக்கடை
முகவரி ஏந்திய கைப்பைக்குள் 
உருண்டுகிடந்தன

மதியவுணவுக்கலங்கள்
எதற்கென்றே இல்லாது 
எல்லாவற்றுக்கும் 
விழுந்துவிழுந்து சிரித்துக்கொண்டிருக்கும் 
அவளுக்கு அழகிய பல்வரிசை
இல்லான் எத்தியதில் இல்லாமற்போன 
பக்கவாட்டுப்பல் ஓட்டைக்காக 
கைமறைத்து சிரிக்கும் இவளுக்கும் 
அப்படித்தான் இருந்தது
ஒவ்வொருத்தியின்
நிறுத்தமும் வரவர 
நாளை பார்க்கலாமெனச் 
சிரிப்பைப் பேருந்துக்குள் இறக்கி 
இறங்குகிறார்கள்.

அன்புக்கும் உண்டு அடைக்கும் தாழ்

சொல்ல வேண்டாமென்றுதான்

நானும் நினைக்கிறேன்

உன் சாம்பிய முகமோ

சங்கடமான பாவனையோ 

இன்னும் இறுகிவிடுமாறு எதையும் சொல்ல வேண்டாம்

சுய இரக்கத்தில் 

எவருக்கும் கேட்காவண்ணம் 

என்னவோ சொல்லிக்கொள்ளுவாய்

அந்தக் கன்றல் ,வெளிறல்

என் சொற்களுக்குப்பின்

பிறக்கவேண்டாம்

எதையோ தேடுவதான பாவனையில் 

உள்ளூர் நகைக்கடையின் 

பெயரழிந்து நிறம் மங்கி

முனை மழுங்கிய கைப்பையின்

மூடவியலா உட்பைகளுக்குள்ளேயே 

சில்லறை சரிபார்க்கும் 

உன்னிடம் என்றும் 

சொல்ல வேண்டாம்

அப்படியே குனிந்து 

எவருமறியாது துளிர்க்கும் கண்ணீரைத் 

துடைக்கவைக்கும் சொற்களை