காணாமற்போன மயிலிறகு

 முதல் வகுப்பிலிருந்து அவனுக்கு இதுதான் நடக்கிறது குட்டிபோடும் என ஒற்றை மயிலிறகை ஒளித்து வைப்பதும் முதலைப் பறிகொடுப்பதும் ***********************************************

தடும் திடுமென இடித்துவிட்டு

ஒரு தூறல் கூடப்போடாமல்

ஓடிப்போகிற மேகங்களை

அண்ணாந்து பார்த்து

ஒன்றும் நடக்காதது போல நகரும் அளவு

பக்குவப்பட்டு விட்டாயிற்று

எச்சரிக்கையாக எடுத்துவைத்துக்கொண்ட குடை பற்றி

எதற்கு புலம்பல் **************************************

பாலில்லாமல் சர்க்கரையில்லாமல் வாடையேறிய வெந்நீரைக் குடித்து வாழலாம் என்ற முடிவுக்கு வந்துவிட்ட பிறகு உன் முகந்திருப்பல்

ஒன்றும் செய்யப்போவதில்லை

**************************************************

தட்டுத்தடுமாறி

அங்கே பிடித்து

இங்கே தாங்கியே

நடந்து

பழகிவிட்டதா

முதுகெலும்பு நேராய் நிற்பதே

பிரமிப்பாகி விடுகிறது ************************************************

புன்னகையோடு கடந்தபோது

நம்மைப்பார்த்து

என்றே

நம்பிய வினை

விதைக்காத குழிகளுக்கு

மாங்கு மாங்கென

நீரிறைக்கும் வேலை பிறகென்ன

இறைத்துச்சிவந்த கரமும்

கசிந்த கண்ணுமாக...

காத்திருங்கள்

காலியாகிவிட்டது

எல்லாவற்றுக்கும் ஒருகாரணமும்
எல்லாவற்றுக்கும் ஒரு மறுதலிப்பும்
எல்லாவற்றுக்கும் ஒரு முகந்திருப்பலும்
எல்லாவற்றுக்கும் ஒரு கண்டனமும் வைத்திருக்கிறீர்கள்
அந்த அம்பறாத்தூணியில்
வேறென்னவெல்லாம் இருக்கிறது
இந்த கனிவு,கருணை,கத்தரிக்காய்
மருந்துக்கும் இல்லையா
ஓரத்தில் எங்காவது ஒண்டிக்கிடக்கிறதா
தேடிப்பாருங்களேன்