பெருவாழ்வே

 நறநறவென

குழல்விளக்குகளைக் கடித்துத் தின்பவனைப் பார்த்து வியந்தபோது

ஒரு வளையத்தில்

காலும்

இன்னொரு வளையத்தில் கையுமாகத் தாவிய

பார் விளையாட்டுப் பெண்ணை அண்ணாந்து பார்த்தபோது

பெட்டிக்குள் பெண்ணையனுப்பி

முயலை வரவழைத்தவனுக்காகக் கை தட்டியபோது

அறியவில்லை

அத்தனையும்

செய்வேனென்று

கண்ணீர்த் துளியத்தனையும்

இருளில் முகவரிதவறி

நிலவு சொட்டிய

பனித்துளி

என நான் சொல்லவும்

நீங்கள் நம்பவும்...

என் பெருவாழ்வே....

கனவு செருகிய எறவாணம்

எதை நோக்கிதான் இத்தனை நடப்பது
சிறு அரளிக்கிளையை ஊன்றிக்கொண்டு
நடைக்கு கூட கசப்பேறிய பின்னும்

**********************************************************
கனவுகளைச்செருகிவைத்த எறவாணம் 
யானைவிரட்டலில் பிய்ந்துபோனது
குப்பை வாருவதில் நிற்கிறது கைவண்ணம்

**************************************************************

திரளும் கண்ணீரைத்
தொட்டு தொட்டு ஒற்றிப்பிழிந்து
நீர்வார்த்த முல்லையின் நிறம் 

அப்படித்தான் இருக்கும்

***************************************************************
பழமுதிரிலோ,உழவர் சந்தையிலோ 
பேரம் பேசியோ பேசாமலோ 
நீங்கள் வாங்கும் சுரை எல்லாம் 
முற்றித்தான் இருக்கிறது
இற்றுப்போன பால்யத்தின் 
கூரையில் எக்கி எக்கி
இழுத்துப்பிய்த்த சுரைப்பிஞ்சின் 
மென்மையை நினைவில் கிடத்தியிருக்கும்வரை

அந்தப்புறங்கையில் பாருங்கள்
அதே பனித்துளி
****************************************************************************