பறவையின் இறகில் உன் நிறம்

உலகில் புரிதல் மிச்சமிருக்கிறது
அன்பு மிச்சமிருக்கிறது
ரசனை மிச்சமிருக்கிறது
உன்னை அழைத்து சொல்ல நினைத்தவற்றை
எனக்கே சொல்லிக்கொண்டேன்
உனக்காய்த் தோன்றும்போது
நீயும் சொல்லிக்கொள்வாய்
கருநீலவாலை லேசாக உதறி
விரித்துக்கொள்ளும்
அந்தப் பறவையின் இறகில் 
உன்நிறம் உணர்வதும் அப்போது நடக்கும்

படம் swaminathan Rajamani

நதி

நான் பார்த்த நதியின்
நீளமும் அகலமும்
நான் பார்த்த மலையின்
உயரமும் உச்சியும்
நான் பார்த்த வானத்தின் 
நிறமும் விரிவும்

நான் பார்த்த வரை

ஓடிக்கொண்டிருக்கும் நதியும்
உயர்ந்து கொண்டிருக்கும் மலையும்
மிதந்து கொண்டிருக்கும் வானமும்
நிஜத்தில் எதுவென்று
நீங்கள் பார்த்ததுண்டா

நிறமாலை

அடிவயிற்றிலிருந்து
குரலெடுத்து அன்னையின் மரணத்தில்
கட்டியழுத சித்தியின் 
கத்தரிப்பூ சேலை நிறமா

வளர்வதற்கெல்லாம் முன்பு
பிள்ளைகள்
உருட்டிப்போடச்சொல்லி உண்ட
பொட்டுக்கடலைத் துவையல் சோற்றின்
மங்கிய சந்தன நிறமா

ஊசுட்டேரிக்கரையில்
தருவதான பாவனையில்
தாய்க்குக்காட்டி தான்ஊட்டிக்கொண்ட
குழந்தையின் பிஸ்தா பனிக்கூழ் நிறமா

பாராமல் கடந்துசெல்லும்
போக்கு தாளாமல்
நீலத்தையும் பச்சையையும்
துறந்து நிறமிலியாய்
ஆர்ப்பரிக்கும் பௌர்ணமி அலைநிறமா

அன்பின் கதிர் என்ன நிறம்