தாட்சாயணி

 வலம்புரிச்சங்கில்

பிறந்தாளாம்

ஆனாலும்

மெழுகிய முற்றத்தில் பிறந்த

எங்க சின்னாயி போலவே

கட்டினவனுக்கும் பெத்தவனுக்கும் நடுவே

சிக்கிச் சிதறியிருக்கிறாள்

தாட்சாயணிதான் சின்னாயி

சின்னாயிதான் தாட்சாயணி

ஆனால் அவள்களுக்கு

அவள்களைத்தவிர

யாரைப்பற்றியோ கவலைப்படதான்

வாய்த்திருக்கிறது

சொந்த முற்றமிலா வாழ்வு

முல்லை மலர்வதும்
வாழை மடலவிழ்வதும்
பார்க்குமளவெல்லாம்
வாய்க்கவில்லை
சொந்த முற்றமின்றி 
சோற்றுக்கவலை துரத்தும்
வாழ்வில்

மார்ச் பூக்கள்

ஒளிச்சுடர் என்னைக்கடந்து செல்கிறது ஆரஞ்சு தளும்ப
மஞ்சள் மின்னலை 
எதிர்நோக்கிய கண்களோ
பாதையில் அலைபாய்கின்றன
******************************************
குவிந்த கரங்களுக்குள்
பொன்வண்டு 
சிறகடிப்பதை நிறுத்தாது
தீப்பெட்டி சதமில்லை 
சிறகுக்கு
சொல்லிக் கொண்டுதான்
இருக்கிறேன்
உயர்ரக தினை மற்றும்
கத்தரி என்வசமுண்டு என
**************************************
வெயில் இறங்கி இறங்கி 
முற்றத்தையும்
வாசலையும் விட்டு 
வெளியேறி 
தெருவின் அடியில்
படுத்துக்கொள்ளத்தானே
போகிறது.
அதை நினைத்து
துடைத்திடு
வியர்வை அல்லது கண்ணீர்