இல்லாதபோது பெய்த மழை

இல்லாதபோது மழை பெய்திருக்கிறது
எப்படித் தெறித்திருக்கும்
எப்படி வழிந்திருக்கும்
எப்படித் தேங்கியிருக்கும்
எந்த சுவடும் இல்லாது போன 
இந்த மாலை துக்கமாய் இருக்கிறது
இருக்கும்போது
நடப்பது எதையுமே உணரமுடியாது போகிறது
நீ ஏன் இல்லாதபோது நடந்த ஒன்றைப்பற்றி
இவ்வளவு வருந்துகிறாய்
நாளையும் மழை வரலாம்
என்று நீ ஆறுதல் கூறுகிறாய்
உணராத சொற்களோ புதிய துக்கம்
நேற்றைய மழையும்
நாளைய மழையும்
ஒன்றாகி விடுமா