பூரண நிலா

எங்கோ தூரத்தில் ஒலிக்கிறது 
மனம்கவர்ந்த பாடல்
இடம் வலமா எங்கு நெருங்கவென 
முடிவு செய்யுமுன் 
முடிந்தேவிடுகிறது

**************************************************
மஞ்சள் தளும்பும் 
நிலவுக்குத் தெரிவதில்லை 
கோபதாபங்களோ 
தூரதேசங்களோ

**********************************************
கைப்பிடிச்சுவரில் 
ஒருகையை இறுகப்பற்றி 
மறுகையால் விரிந்த உலகை எள்ளுகிறாள் 
ஒருகாலில் நின்றாடும் பாப்புக்குட்டி
பாத்து...பாத்து எனும் 
என்னையுந்தான்

******************************************************
நேற்று என்பது எவ்வளவு நிம்மதியானது
ஒரு கோடு குறைவான நிலாதான் 
என்றாலும்
அவனை நினைவூட்டவில்லை
*****************************************************
அண்ணாந்து பார்க்காமலே 
தனிப்பாதை தந்த அச்சமோ தைரியமோ 
மினுங்க 
தாளம் தப்பிய குத்துப்பாடலை 
உரக்கப் பாடியபடி
மிதிவண்டியில் போகும் 
அவன் பின்னாலேயே போகிறது பூரணநிலா
மௌனமாய் ரசிக்கும் 
என்னைக் கைவிட்டு

*************************************************
பெட்ரோல் புகை அழுக்கில் மங்கிக்கிடந்த அரளிக்கும்
ஆளுயர முருங்கைக்கிளைக்கும்
கிழிந்த வாழையிலைக்கும்
வஞ்சமின்றி வாரி வாரிப்பூசுகிறது
இருளின் ஒளியை 
ஒய்யாரப்புன்னகை கசியக் கடக்கும்
சமான நிலா



கருத்துகள்

இந்த வலைப்பதிவில் உள்ள பிரபலமான இடுகைகள்

பெண்ணுடல்,பெண்ணுறுப்பு,பெண்ணுயிர்

கட்டைவிரல் கீழ் யானை

மூக்குத்திப் பெண்கள்