பயணங்கள் முடிவதில்லை

ஒவ்வொன்றாய்ச்
சொல்லித்தருகிறாள்
ஒன்று இரண்டு கற்கும் பாப்புக்குட்டி
மெதுவா மெதுவா
மனசுக்குள் சொல்லிக்கொண்டேன்
அதுவரை உயிர்த்திருக்கலாமே
************************************************
இந்த விளக்கு எனக்கானது
எல்லோருக்குமான சூரியனைவிட
என்ன குலாவல்
அசைந்து அசைந்து ஆடும் சுடரோடு
****************************************************
முகத்திலறையும் காற்றோடு ஒருமுறை
அகங்குமுறிய சண்டையின்
தொடர்ச்சியை அலைபேசியில் 
உயிர்ப்பித்தபடி ஒருமுறை

புறக்கணிப்பின் வலியை
பறக்கும் தலைமுடிக்குள் 
அமுக்கி ஒதுக்கியபடி ஒருமுறை
நான்கைந்து வாகனம் முன்னர்
உயிர் துறந்து 
ஆம்புலன்சுக்காக இறைந்து கிடக்கும் 
ஒருவனோடு இன்னொருமுறை
.......
பயணங்கள் முடிவதில்லை