சொல்ல வேண்டாமென்றுதான்
நானும் நினைக்கிறேன்
உன் சாம்பிய முகமோ
சங்கடமான பாவனையோ
இன்னும் இறுகிவிடுமாறு எதையும் சொல்ல வேண்டாம்
சுய இரக்கத்தில்
எவருக்கும் கேட்காவண்ணம்
என்னவோ சொல்லிக்கொள்ளுவாய்
அந்தக் கன்றல் ,வெளிறல்
என் சொற்களுக்குப்பின்
பிறக்கவேண்டாம்
எதையோ தேடுவதான பாவனையில்
உள்ளூர் நகைக்கடையின்
பெயரழிந்து நிறம் மங்கி
முனை மழுங்கிய கைப்பையின்
மூடவியலா உட்பைகளுக்குள்ளேயே
சில்லறை சரிபார்க்கும்
உன்னிடம் என்றும்
சொல்ல வேண்டாம்
அப்படியே குனிந்து
எவருமறியாது துளிர்க்கும் கண்ணீரைத்
துடைக்கவைக்கும் சொற்களை
கருத்துகள் இல்லை:
கருத்துரையிடுக