அரவப்பொட்டு

ஒவ்வொரு அரளிவிதைக்குள்ளும் 

துருவித்துருவி எடுத்த கசப்பின் துகள்

ஒவ்வொரு அரவமும் 

பொட்டுப்பொட்டாய் வைத்துச்சென்ற 

விஷ இழை

ஒவ்வொரு துளிஒளியுமற்ற
இரவின் பூரணதிகில்

எல்லாவற்றையும் விட
அதிகமதிகமாய்
உன் ஒரு சொல்

********************************************************

நான் என்ன நினைக்கிறேன்
என நினைக்காத உன்னைப்பற்றி
இவ்வளவு நினைக்க நேர்வது
யாருடைய விதி

********************************************************

தெரியும்
இதே பூமியில் ஏதோ ஒரு கோட்டிற்கு 

முன்னோ பின்னோ
உன் பெருக்கலைக் கணக்கிட்டுக் கொண்டிருப்பாய்
கடன்வாங்கிக் கழித்ததை 

மறந்துவிட்டு

வாழ்க்கை எல்லாவற்றையும்
நேர்செய்ய வற்புறுத்தாது
உன்போன்றவரிடம்

************************************************************