தளர் நீலம்

தளர்ந்தநடையோடு இரவுப்பணி முடிந்த 
நீலர் போகிறார்
அவசரமாகச் சைக்கிள் மிதிக்கும் 
இளையனுக்கும் தெருக்குழிகளுக்குமாகத் 
தன்னை நிலைப்படுத்த 
இறுகப்பிடித்துக்கொண்ட பின்னிருக்கை
 நீலரின் புன்னகையைப் பெற்றுக்கொள்ளாது 
குனிந்தே கிடக்கிறது நடக்கும் நீலரின் தலை
போதும் போவெனத் 
தலையை முன்பக்கம் திருப்பிக்கொண்ட 
சைக்கிள் பயண நீலரின்
புன்னகை 
நேற்றுப்பார்த்த வாதங்கொட்டைபோல் 
நசுங்குமுன் நாமாவது எடுத்துவைப்போம் 
என்றுதான் வேகமாகப் படியிறங்கினேன்
" என்ன"
" ஒன்றுமில்லை. சும்மா"