எண்ணிக்கைகளின்
முரணைக்கண்டு
அஞ்சுவதற்கு
யோசித்துக் கொண்டிருக்கிறது ஊர்
குனிந்து நிமிர்ந்தால்
முதுகு வலிக்கலாம்
என்பதால்
வீடு பெருக்குவதைத் தவிர்த்து
என்ன செய்யலாம் என்கிறாள் தோழி
எந்த கவசத்தால் கிருமியைத் தடுக்க முடியும்
என்ற விவாதத்தலைப்புகளை
ஊடகங்கள் பரிசீலிக்கின்றன
கடையடைப்புக்காக
வாங்குவதா
தன்னை அடைத்துக்கொள்வதற்காக
வாங்குவதா என்ற
யோசனைகளோடு
குடும்பத் தலைவர்களும் தலைவியரும்
எதையெதையோ
வாங்குகிறார்கள்
தேர்வு உண்டா இல்லையா
தள்ளி வைக்க வேண்டுமா
பதில்களை உடனே சொல்ல வேண்டாம்
தீர்ப்பு வரட்டும் என்று கண்ணயர்கிறார்கள் அமைச்சர்கள்
புதிய இயல்புக்குப் பழகிவிட்டீர்களோ
மிகப் புதிய இயல்பைக் காட்டவா
கொக்கரிக்கிறது கொரோனா
கருத்துகள் இல்லை:
கருத்துரையிடுக