வேணாம் சார்
வீடு எப்படியோ இருக்கட்டும்
எண்ணெய்க்கை
பிள்ளைகள் வீட்டுக்குள் கிரிக்கெட் அடித்து ஆடும்
டென்னிஸ் பந்து கறை
அதிகப்படியாகப் பிதுக்கி
அவசரமாகத்தள்ள முயன்று
உள்ளே போகாது சுவரில் தடவிய
அடர் சிவப்பு பற்பசை
உரித்து ஒட்டி
உரித்து ஒட்டி
இனி உதவாதென விட்ட ஒட்டுப்பொட்டுகள்
துளி அதிகமாகி வழித்த மையும்
சாயமும் சுண்டிவிட்ட சுவடுகள்
முன்கை மாதிரியே தெறித்த தாளிப்பின்
சுவடேந்திய அடுப்படி
குழைந்து கரைந்த சோப்பின்
பாத்திரக்குலாவலுக்கு மீந்த உப்புப்படிவம்
எந்த நிறமுமில்லாது
லேமினேட் செய்த வீடு எதற்கு
ஆயினும்
ஒரு உபகாரம் முடியுமா
அணிலாடும் முருங்கைப்பூக்கிளை
தளிர்நடையின் சிவந்த முதல் அடி
அருந்திய பால்துளி இதழ்க்கடையிலொழுக
கண்ணயர்ந்து சிலிர்த்த சிரிப்பு
முத்தத்தை
ஐ..எச்சி...எனத்தள்ளிய நாணத்திருமுகம்
ஒன்றிரண்டாவது
லேமினேட் செய்து தர இயலுமா
கருத்துகள் இல்லை:
கருத்துரையிடுக