கடற்கரைக்குச் செல்லுந்தோறும் பின்கொசுவச்சேலையும்
பூண் இட்ட கோலுமாகச் சுற்றிச்சுற்றி வருவாள் ஒருத்தி
அவளையொத்த இன்னொருத்தி
சற்று தொலைவில்
வலப்பக்க முந்தானையும் முக்காடுமாகச் செல்பவளையோ
சரிகைப்பொட்டு சேலை தடுக்க தடுக்க
தன்குழுவோடு இணைய ஓடும் வெளியூர்ப்பெண்ணையோ
துரத்திக் கொண்டிருப்பாள்
போனவாரம்
தர முன்வந்த பத்து ரூபாய் மறுத்து
உன் கை நீட்டினால்
என் கை நீளும் என
சிரித்து நகர்ந்தவள்
அவளா
இவளா
தெரிந்து கொண்டிருக்கலாமோ
துக்கத்தின் நெருப்புத் துண்டை
நொறுங்கத்தின்று
நூறுவயது வாழப்போவதை
மறுக்க மறுக்க யாரையாவது
துரத்தி
விதி சொல்ல அழைக்கும்
அவளும்
அப்படியொரு நெருப்புத்துண்டு
ஊண்காரியாகத்தான் இருப்பாளோ
அக்கினிக்குஞ்சின்
பொந்தாக
அசைகிறது
அவள் இடுப்பிலாடும் சுருக்குப்பை
இடதுமூக்கில் வளையமிட்ட
நாணச்சிரிப்பழகியின்
முந்தானையிலொடுங்கும் சிறு கடவுள் சிரிக்கிறது
சகல துன்பமும் தடுக்க
அவள் நீட்டும் தாயத்து பார்த்து
கருத்துகள் இல்லை:
கருத்துரையிடுக