பேக்கிங் சோடா,முட்டை,மைதா,சர்க்கரை,எசென்ஸ்
என்று நீண்ட பட்டியலை எழுதிக்கொண்டாள்
வீட்டுக்குப் பக்கத்தில் சாமான் வாங்குங்க
கண்டித்தது அரசு
தண்ணியில்லாக்காடு
என்பதன் புதிய சொல்முறை
டெலிவரி கிடையாது என்பதாகும்
மைக்ரோவேவ் அடுப்பின் மேல் போர்த்தியிருந்த துணியைத்
தூசு
போர்த்தியிருக்கிறது
ஒரு கூடைகேக்கில்
நிறைந்தவற்றை
நிறைவாக்க
எத்தனை ஆயத்தங்கள்
சன்னல் சன்னலாகப் பாடமெடுக்கும் யுடியூப் குருமார்கள்
லைக் பண்ணுங்க
பெல் பட்டனை அழுத்துங்க
என்று விதவிதமான எசென்ஸ்களைக்
கலந்துகொண்டிருந்தார்கள்
எப்போதாவது பிறந்து வைக்காதீர்கள்
என்று சொல்லலாம்
அப்போதைக்கப்போது கற்றுவிடுங்கள்
என்றும் சொல்லலாம்
சென்றவருட நட்சத்திரத்தொப்பிகளையும்
குட்டி மெழுகுவத்திகளையும்
தேடி எடுக்கவாவது கூடாதா அப்பா
என்கிறாள் பாப்புக்குட்டி
கருத்துகள் இல்லை:
கருத்துரையிடுக