காப்படி முல்லை வாங்கிக் கையொடியக்கட்டி
நல்ல விளக்குக்கு ஒரு கிள்ளு
எப்பவோ செத்துப்போன நாத்தனார் படத்துக்கு ஒரு கிள்ளு
மத்ததெல்லாம் மகளுக்கு
வளைச்சு வளைச்சு வெச்சிவிடும் பெரியம்மாவின்
சீவாத தலையில
மூணுபல்லு உடைஞ்ச சீப்புதான் இருக்கும்
இரட்டைப்பின்னலுக்கும் இணைப்புப்பாலமாய்
இழுத்துவைத்த மல்லி
நேரம்போக தளர்ந்து தொங்கும் கழுத்தோரம்
கூடவே செருகிய ஒற்றை ரோஜா
எண்ணிவாங்கித்தொடுத்த
கனகாம்பரமோ
டிசம்பர் பூவோ
எதற்கும் சிணுங்காத கோமதி
தஞ்சாவூர்க் கதம்பம்டி என்று கெஞ்சினாலும் மறுப்பாள்
கனக்கும் செவ்வந்திகள் கூடத் தேவலாம் சிடுக்கெடுக்க நாளை
அசங்காதே
அசங்காதே எனக் குட்டு வாங்குவது யாராம்
கறுப்புக் குஞ்சங்களின் பொன்மஞ்சள் அலங்காரம்
ஒவ்வொரு தேர்க்கடை தெப்பக்கடை வைபோகம்
வாழை மட்டையும் பூ ஊசியும் சாட்டின் நூல்கண்டுமாக
சின்னு அக்காவின்
பரபரப்பில்
பூதைத்த சடைகளைத்
தலையணைக்குமேல் நீட்டி வைத்துக் காப்பாற்றிக்
கூட ஒருநாள் நட்சத்திர அந்தஸ்துக்கு
ஆசை கொள்வர் அம்மாக்கள்
தாழம்பூச்சடை என்றால் தைரியமாக இரண்டுநாள்தான்
சந்திர சூரிய பிறைகளும் சடைவில்லையும்
எண்ணெய் இறங்கிய கற்களைப்
பொருட்படுத்தாமல் இரவல் போய்வரும்
அரும்பே' கூவியபடி சைக்கிள் வராத நாட்களிலும்
அலங்கார ஆசைக்காக
உருவாகி வந்தன உறை மணிக்குஞ்சலங்கள்
ராக்கொடியும் பூச்சடையுமாக
ஒவ்வொரு பெண்ணையும்
அழகுபார்த்தன
புகைப்பட நிலையங்களின் கண்ணாடிகள்
மதுரைமல்லிக்கு புவிசார் குறியீடாமே
அம்மாவின் நினைவில் மணக்குமே
என்றெண்ணிக் கேட்கும் மகள்
கிரீமை மீறித் தொந்தரவு செய்யும்
எதையும் தொடுவதில்லை
அவள் மட்டுமென்ன
ஒருவரிசை மல்லி ஒரு வரிசை கனகாம்பரம்
எனச்சூடிய நாள் போய்
ரெண்டுமல்லி ரெண்டு பட்டன்ரோஸ் வைத்த
விரற்கடைப் பூவும் தாளாத அளகபாரம்
நிறைய படங்கள் இருக்கின்றன
வாங்கும் சரங்களைப் பங்கிட
முத்துமணிக் குஞ்சங்களும்
கண்ணில் படுகின்றன
எங்காவது திருவிழாக்கடைகளில்
கருத்துகள் இல்லை:
கருத்துரையிடுக