அரும்புகளை இரட்டை இரட்டையாக
அடுக்கும் வேகமும் தொடுக்கும் அழகும்
காம்பு உடைந்த செவ்வந்தியையும்
சாமர்த்தியமாக வரிசைக்குள் பொதிந்துவிடும்
சாமர்த்தியமும்
கனகாம்பரமும் டிசம்பர் பூவும்
இற்றுவிடாமல் இறுக்கி நெருக்கும் அழகும்
மருவையும் நீலத்தையும் பச்சையையும்
எண்ணாமலே திட்டமான இடைவெளிக்குள்
வைத்துவிடும் நேர்த்தியும்
வாழ்க்கையில் எப்போதாவது
காட்ட முடிந்திருந்தால்
எவ்வளவு நன்றாக இருந்திருக்கும்...
முழங்கை வரை இழுக்காமல்
முழத்தைச் சுருக்கி ஒரு சின்ன திருப்தி
*********************************************
வளையல்களைப்போல
பாசாங்குகளையும் கழற்றிவைத்துவிட்டால்
வீட்டுக்குள் வந்துவிட்ட பூரணம்
பிறகு....
பிறகென்ன தளர்வாடை போல
பிரத்யேக வீட்டுப் பாசாங்குகள்
இருக்கவே இருக்கிறது
கருத்துகள் இல்லை:
கருத்துரையிடுக