மிதியடிகள் கைவிட்ட எசமானர்

அது நின்றுகொண்டிருக்கிறது
தான் நாய்க்குட்டி
அல்லது
பூனைக்குட்டிதான் என்ற நம்பிக்கையோடு
வாலைக்குழைத்துப்பார்த்தபடி
அல்லது
வரிகளின் நிறத்தில்
மீசைமுடி இருக்கிறதா என்று 

கண்ணை ஒருக்களித்துப் பார்த்துவிட முயற்சி செய்தபடி

ஒருக்களித்து என்ற சொல்லைக்கேட்டதும் 

உங்களுக்குப்பூர்வம் நினைவிலாடுகிறது

ஒருக்களித்துத் துயில முற்பட்ட குற்றத்துக்காக
எசமானர் பட்டம் சூட்டிக்கொண்ட

 வளர்ப்புப்பிராணிகளால் 

ஆசனம் மறுத்து வாசலுக்குத் துரத்தப்பட்ட 

எசமானர் நீரென நினைவுபடுத்த ஆனமட்டும் பார்க்கிறீர்கள்

அதுவோ
நேற்றையே மறந்துவிட்டு
துண்டுமிதியடியே சதமென அலைகிறது

அப்பிறவி அந்தயுகம்
ஒழுகும் எச்சிலில் கரைகிறதே எனக் 

கண்ணீர் விட்டு கலைந்து போகவும் கூடுமோ

பார்வை

எவ்வளவு பிடிக்கும்
எனக்கேட்டு கைவிரித்துக்காட்டிய
வயதிலிருந்து சிலர் வளர்வதேயில்லை
கை எப்போதும் விரிக்கப்பட்டே
....
பாவம்
நீங்களாகப் புரிந்து கொள்கிறீர்கள் 
இரண்டையும் இணைத்து

***************************************************************
மேசை இடுக்குகளில் ஒளிந்துகொண்டு 
மின்விசிறியின் ஒண்டுக்காற்றில் 
சிலிர்க்கும் 
அதைத் தூசி என்று
காலால் எத்தும் உங்களைப்பற்றி
என்ன நினைப்போ

*************************************************************
கண்ணாடிப்பரப்பெலாம்
அழுக்கு
பார்க்க வழியில்லை
மங்கலாவது
 பிம்பமா
பார்வையா
சொல்ல ஒரு குரலுக்காக
காத்திருக்கிறது ஆடி
******************************************    

உடைந்தது

உங்கள் தெருவிலும்
கேட்டிருக்குமே
உங்கள் மூதாதைக்
காலத்தின் நீலத்தில்
வானத்தை மாற்றுபவன் குரல்

அதற்கு முன்னர் வந்தானா
பின்னரா
கடலை மாற்றுகிறவன்

உடைந்தது எதுவாயினும் பற்றவைப்பேனென்று
நேற்று ஒருவன் கூவியது கேட்டீரோ

என் அம்மை 

மனசைக் கையிலெடுத்துக்கொண்டு 

வாயிலுக்கும் உள்ளுக்குமாக
நடந்துகொண்டிருக்கிறாள்

வந்தால் சொல்லுங்கள்

எதை எடுத்தாலும் பத்து

வானம் அத்தனை கறுப்பாகி விலக்கினாலும்
வெட்கங்கெட்ட விண்மீன்கள் 
பெயரையும் மாற்றுவதில்லை 
ஊரையும் மாற்றுவதில்லை

**********************************************************************

வண்ண வண்ணமாக
நிறைந்திருக்கிறது
சந்து முழுக்க
"எதையெடுத்தாலும் பத்து"
அங்காளியைக் காத்திருக்கச் சொல்லிவிட்டு
இந்தக் கூட்டத்தில்தான் கலந்திருக்கிறான் 

குடல்பலியாகப் போகிறவன்

வீட்டுக்குக் கொடுத்தனுப்பிவிட்டு
படுகளம் வந்து சேர்வானென
சூலத்தைக் கிடப்பிலிட்டு
விரித்த தலையை 

சற்றே ஆற்றிக்கொண்டிருக்கிறாள் அங்காளி

**********************************************************************

கடைசிப்பேருந்தையும்
தவறவிட்டுக் காத்திருக்கிறான் ஈசன்
காலந்தோறும் இப்படித்தான் 

எங்கோ நின்றுவிடுகிறேன்
எனப் புலம்பிவிட்டு
அக்கம்பக்கம் பார்த்துக்கொண்டான்
"பெருமைக்கொண்ணும் கொறச்சலில்ல.... காலபைரவனுக்கு "
அசரீரியாய்க்கேட்கிறது சங்கரி குரல்
அப்படியொன்றும் இல்லாதபோதும்

நதியில் தேயும் கூழாங்கல்

ஒருகை ஓசையைத்தான்
கேட்டுக் கொண்டிருக்கிறீர்கள்

என்னிரு செவிகளும்

வேறு வேறு தளங்களில் கவனிப்பவை

கண்களோ முழுவட்டச்சுழல்

தலைசுற்றிய ஒளிவட்டத்தின்
ஒவ்வோர் சுடரின் அலைநீளமும்
ஆதியந்தம் அறியாது

என்ன ஒன்று

என் அழுக்குத் தளராடையும்

அள்ளிமுடிந்த கொண்டையும்தான்

எனக்கே என்னை நினைக்கையில்
தோன்றுகிறது

அளவுத்திட்டத்தில் சமைத்த கரண்டிக்கு
ஒருநாளும் கை குவித்தறியா சுவை

மனப்பாடம்

என்

கணிணியோ எனக்கு முன்
பைக்குள் நுழைத்துக்கொண்டு

படியிறங்கும்

என்னுடையதெல்லாம்

என்னுடையதல்ல என்பதறியும்
என்கடனட்டையின் காப்பு எண்

இருந்தாலும் கடையிதழில் அலட்சியம்
வழியவிட இன்னும் வரவில்லை உன்னைப்போல்

போகட்டும்

இப்படியே நதியில் தேயும் கூழாங்கல்

ஏப்ரல்2018 மங்கையர் மலர்

உதட்டோர ரத்தம்

திறந்த காயத்துக்கு
கத்தியால் மருந்திடவே
படித்த பரம்பரை
அரிவாளால் பூப்பறிக்கும்
பனித்துளியையும் விசும்பின்
கண்ணீரெனக் கசிந்த கதை
பூ மறக்கும்
கையோ கத்தியோ இங்கேதானே வரப்போகிறாய்
என சத்தமின்றிச் சிரித்தபடி காத்திருக்கும் மயானம்
அங்காளி உதட்டோர ரத்தத்தை
கைக்குட்டையால் சரிசெய்துவிட்டு
 நாவைச் சரியாக 

தொங்கப்போட்டுக் கொள்கிறாள்

மழை மழை....

நீங்கள் புறக்கணிப்பீர்கள் எனத்தெரிந்தாலும் 
காற்றோடு போராடிக்கிழிந்து 
உங்கள் கொல்லை வாழையிலேயே 
தங்கிவிடுகிறது இலை
ஆறுதலாக இரண்டு துளிதெளித்து 
நகர்கிறது மழை

****************************************
மழையின் குளுமை மனங்கொள்ள
வா
என்னை ஓரமாக எடுத்து வை 
யாரைக் கூப்பிடுவதெனத் 
தவிக்கிறது தொட்டிச்செடி

****************************************************
பார்ப்பதற்கு நீங்கள் தேடுவது போலவே
விழுவதற்கு மழையும் தேடுகிறது 
ஒரு கண்ணாடி சன்னலை
அப்போது வழிந்த அழகின்
நினைவு
அதற்கும்
(nandri TK Kalapriya)
****************************************************