ஏதாவது
சொல்லவேண்டும்
உனக்கு
திப்பி திப்பியாக
தூக்கிக் கொண்டு நிற்கும் அந்த நெற்றியோரக்
கடும்சுருள் வளையங்கள்
உன் கூந்தலுக்கு
ஓவியச்சாயல்
தந்துவிடுவதை
தினந்தோறும்
மிகச்சரியாக
8 26 க்கு என்னைக் கடக்கும்
உன் சைக்கிளின் நேரந்தவறாமையை
நைந்த காது பட்டென்று அறுபட
உணவுச்சம்படத்தைத் தலைகுப்புறத் தள்ளிவிட்ட
சாப்பாட்டுப் பையின்
மீசையில் மண் ஒட்டாமல் தட்டிவிட்டபடி
சட்டென நகர்ந்தபோது
இமைக்குள்ளேயே அழுத்தமாக
நின்றுகொண்ட
உன் கண்ணீர்த்துளிகளின் கட்டுப்பாட்டை
இப்படி ஏதாவது சொல்ல வேண்டும் மகளே உனக்கு
8 28 க்கு நீ கடக்கும் யாரிடமாவது
சொல்லி
அந்த இரு நிமிடத்தை நிறுத்தி வைக்க முடிந்தால்
எனக்குக்கிடைக்கும் இரு நிமிடங்களில்
அதைச் சொல்லி விடுவேன்
கருத்துகள் இல்லை:
கருத்துரையிடுக