பேருந்தில் இறங்கிய சிரிப்பு

நகைக்கடை துணிக்கடை
முகவரி ஏந்திய கைப்பைக்குள் 
உருண்டுகிடந்தன

மதியவுணவுக்கலங்கள்
எதற்கென்றே இல்லாது 
எல்லாவற்றுக்கும் 
விழுந்துவிழுந்து சிரித்துக்கொண்டிருக்கும் 
அவளுக்கு அழகிய பல்வரிசை
இல்லான் எத்தியதில் இல்லாமற்போன 
பக்கவாட்டுப்பல் ஓட்டைக்காக 
கைமறைத்து சிரிக்கும் இவளுக்கும் 
அப்படித்தான் இருந்தது
ஒவ்வொருத்தியின்
நிறுத்தமும் வரவர 
நாளை பார்க்கலாமெனச் 
சிரிப்பைப் பேருந்துக்குள் இறக்கி 
இறங்குகிறார்கள்.