வேலையாம் வெட்டியாம்

எதிர்மனையில் ஒரு வேப்பங்கன்று
நான்பார்க்க எழுந்ததுதான்
ஒரு மாடிஉயரம் தாண்டும்போதும் 

எனக்கு கன்றுதான்
உளைச்சல்களின்போது உரையாடத்

தோதான துணை
போதுமான தூரம்

மின்வடத்தில் இடித்தகிளையை
யாரோ கழித்து விட்டார்கள்
அன்றாடத்தழையை 

யாரோ கூட்டித்தள்ளுகிறார்கள்

என்னோடுதான் உரையாடுகிறது

கண்டுபிடிக்க இயலாதபடி 

உட்கிளைக்குள் குயிலை அமர்த்திக்கொண்டு 

என்னை எழுப்புகிறது
எட்டு பத்து குருவிகளின் 

கோலாகலக்கூச்சல் 

இளங்காலையை இணக்கமாக்கும்

பாதணிகளைப் பொருத்திக்கொண்டு 

இறங்குமுன் பார்த்தேன் 

மிச்சமிருக்கும் ஒற்றைப்பூங்கொத்தை 

எனக்காகவே ஆட்டிக்கொண்டிருக்கிறது

உன்னோடு வாழாத வாழ்வென்ன வாழ்வோ
வேலையாம் வெட்டியாம்