பழுப்பேறிய காலம்

ஒட்டிய கன்னத்துடன் இருந்தபோது அம்மாவுக்கு
சற்றே பல் வெளியே நீண்டிருக்கிறது
கறுப்பு வெள்ளைப் படமென்பதால்

 அவள் சேலைக்கொசுவம் 

ஈரமாக இருந்ததா எனத்தெரியவில்லை
ஆனால் அப்படித்தான் இருந்திருக்கும்
புகைப்படமெடுக்கப் போகுமுன்
வீட்டுவேலை முடித்து வந்திருப்பாள்
நாற்காலியில் அகன்ற கால்களுடன் அமர்ந்த 

அப்பாவிடம் சாயாமல்
அம்மாவோரம் சாய்ந்த பெரியவனும்
அம்மாவின் இடுப்பில் அமர்ந்து
தோளில் முகம்சேர்த்த
சின்னவனுமாக
அது ஒரு பழைய குடும்பப்படம்
இப்பொழுது
அம்மா பக்கம் 

சாயவேண்டியதில்லை எவரும்
அம்மாதான் யார் பக்கமாவது

சாய வேண்டியிருக்கிறது