எல்லாவற்றுக்கும் நிவர்த்தி

அச் அச்செனத் தும்மியபடி 
மிளகாய் வறுத்துக்கொண்டிருந்தவள்
உப்புக்கல்லை உடனிட்டு வறுத்தால்
அடக்கலாம் தும்மலை என்றறிந்தாள்
இறுக்கமான சோற்று உருண்டையில் 
இறங்கிக்கொள்ளுமாம்
குழம்பிலிட்ட கூடுதல் உப்பு
ஊளைமோரையும் கரைத்துச் 
செடியில் ஊற்றலாமாம்
எல்லாவற்றுக்கும் நிவர்த்தி தெரிகிறது
இவன் முகக்கோணலுக்குதான்.....
********************************************************
உனக்குப் புரியாது
என்றே
என் மொழியை
இழக்கிறேன்
தலையசைப்புகளுக்காவது
பதில்சொல்
எனக்குப் புரியாவிடினும்
**********************************************
மழை நின்றவுடன்
தண்மை நீங்குகிறது
வழித்துணைக்கு விடை கொடுப்பதாக
ஒற்றை இடி முற்றும் போடுகிறது