என் நிறம் என்ன

  இலை நுனி தாண்டும்வரை

உலகம் பச்சையாகத்தான் இருந்தது

பனித்துளிக்கு

***********"*"

 தன் நிறம் பச்சையென்றே தளும்பிக்கொண்டிருந்த

பனித்துளிக்கு

விழுந்தபின்

குழப்பமில்லை

***†********
ஆற்றின்துளிக்கு

அண்ணாந்து பார்க்கும்போதெல்லாம்

தோன்றும் தானும் ஒருநாள்
 நீலமாகிவிடுவோம் என

*********"********

 சடசடத்து இறங்கும் பொழுதில்

செம்புலம்தான் சேர்கிறோமா
எனச் சிந்திக்கும் அவகாசமில்லை

*********************

 பொத்தல் கூரைக்கடியில் காத்திருந்து ஏந்திக்கொள்ளும்

ஒடுக்குவிழுந்த அலுமினியக்கிண்ணம்

அத்தனை கதகதப்பாகிறது

குளிர்துளிக்கு

*******************

 யாரும் பார்க்கவில்லையென 

உறுதிப்படுத்தியபடி

ரகசியமாகக் கைநனைத்துக் களிக்கும்

பிஞ்சுக்கரம் தொடுகையில் 

குழம்பிவிடுகிறது மழை

அனுப்பிய தேவன்

தனக்குமுன் இறங்கி விட்டானோ என

**************""*"

 வேலையற்றுப்போன நாளில்

ஊர்மந்தையில் சுருண்டிருப்பவன் போல

ஆண்டின் பாதிநாள்

எங்கு கிடக்கும் மழை