மடித்த பேப்பரின்
சிவப்பு வட்டத்துக்குள் பார்த்த நாட்களைவிட
துடிப்பாக இருக்கிறது தொண்ணூற்று நான்கு
தொண்ணூற்றைந்து பார்க்கும் பொழுதுகள்
நகங்களில் வெள்ளைப்பூப்போடும்
பிரார்த்தனை போல
அண்ணாந்து காத்திருக்கிறேன்
எல்லா சிவப்பு வட்டங்களுக்குள்ளும்
அதே மதிப்பெண்களைப்
போட்டுப்போகும்
தேவதைக்காக
******************************************
விட்டுப்போன மன்னிப்புகளைக்
கேட்டுவிட வேண்டுமென்று
ஒருவர் நினைக்கையில்
விட்டுப்போன கருணையைக்
காட்டிவிட வேண்டுமென்று
ஒருவர் நினைக்கையில்
விட்டுப்போன முத்தத்தைப்
பகிர்ந்துவிட வேண்டுமென
ஒருவர் நினைக்கையில்
விட்டுப்போன முகத்தை ஒருமுறை
சேர்த்தணைக்க வேண்டுமென
ஒருவர் நினைக்கையில்
ஆகட்டும் அவ்வாறே என்று
சொல்லிவிடாதே தேவதையே
உன் முற்றுப்புள்ளிகளை அழித்துவிடு
விடுபடல்களைத் துரத்தி வாழ
வந்து சேரட்டும்
கருத்துகள் இல்லை:
கருத்துரையிடுக