கடைகளின் ஷட்டர்கள் மேலேறும் ஒலி
தடதடவென இருக்கைகள் ஆடும்
பேருந்துகளின் ஒலி
கூட்டத்துக்கிடையே
உறுமிக்கொண்டே இருக்கும் வாகனங்களின்
ஒலிப்பான்கள்
அச்சமாயில்லையா
இன்னும் கொஞ்சம் அழுகை
இன்னும் கொஞ்சம் இழப்பு
இன்னும் கொஞ்சம் பரிதவிப்பு
விளையாட்டுக்காக
யாரோ இரும்பு தண்டவாளத்தைத் தட்டிவிட்டாலும்
பையைச் சுழற்றிக்கொண்டு ஓடும்
வயதிலிருந்து வளரவேயில்லையா
*************************************************************
அறிவேன் புத்தனே
எந்த அஞ்சறைப்பெட்டியிலும்
அந்தக்கடுகு இல்லையென்று
ஆயினும்
அழாதே துயர்கொள்ளாதே என்று
ஆணிவேர் அறுந்த இலைகள்
புரிந்துகொள்ள வேண்டுமென்பது
உன் பாஷையில்
பேராசை
காலங்கடந்து நிற்கும்
கல்மரமல்ல நாங்கள்
வேர்பிடித்து நிமிரவாவது வரம் கொடு
கருத்துகள் இல்லை:
கருத்துரையிடுக