சின்ன வாழ்க்கைதான்
எவ்வளவு சின்னதென்றால்
இதோ மச்சுப்படி இறங்கும்
அணில் கடித்த கொய்யா
அந்தப் பச்சைக்குள்ளான பழரோஸ்
ரோஸ் ஓரத்தில் ஏறிக் கொண்டிருக்கும் கொசு
அதற்கென்றுமொரு
சிறகு
அதில் உட்கார்ந்திருக்கிறது
பழிப்பு காட்டும் வாழ்க்கை
***************************************************
சின்ன மண்குவளையில்
தேநீர் தந்தான்
சுழலுமா என்றேன்
உங்களுக்காக நீங்களே எடுத்துச்சென்றால்
என்றான்
அப்படித்தான்
இந்தச் சின்னஞ்சிறு பூமி
என் மேசைக்கு வந்தது
இன்னொரு பூமி
வரும்வரை
இந்தாருங்கள் பீங்கான் குவளைத் தேநீர்
***********************************************
அலைபேசி நிறுவனங்களின்
நிதியோடு அழைக்கும் வங்கிகளின்
செலுத்த வேண்டிய பாக்கிகளின்
நினைவூட்டலில்
குறுஞ்செய்திப்பெட்டி நிரம்பி வழிகிறது
உன் செய்தி வந்தால்
...
அவசரமாக ஒழித்துக் கொண்டிருக்கிறேன்
சற்று தாமதமாக அனுப்பு
கருத்துகள் இல்லை:
கருத்துரையிடுக