புதிய காலண்டர்களுக்கான
வேட்டையை
நடத்த டிசம்பர் பூக்களே
நினைவூட்டிவிடும் மாமாவுக்கு
பற்றுச்சீட்டில் தீபாவளி ஆடைகளை
வாங்கிய கீதா சில்க்சைவிட்டு
பொங்கல் துணிக்கு
புதிய ராமன் ஸ்டோருக்குப் போவார்
அவ்வப்போதாகக் கணக்கெழுதி மளிகை வாங்கும்
செட்டியாரிடம்
எப்பதான் காலண்டர் போடப் போறீங்க
என உரிமையுடன் சலித்துக்கொள்வார்
யாரெல்லாம் சாமி காலண்டர்
போட்டிருக்கிறார்களோ
அவர்களிடம் நிச்சயம் உண்டு ஒரு
உறவாடல்
அல்லது பற்றுவரவு
இப்போதும் அவரைச் சுற்றி
காலண்டர்களில் தொங்கும்
அந்தப் பழைய சாமிகள்தான்
எச்சில் ஒழுகப் படுக்கையில் கிடக்கும்
மாமாவுக்குப் பேச்சுத்துணை
பழைய வருடங்களின் சாமிகளுக்கு
ஆசாமிகள் அளவு பரிச்சயம் மறப்பதில்லை
கருத்துகள் இல்லை:
கருத்துரையிடுக